airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Suliffeerunnermi ikiorsiissutit 

Innuttaasut aangajaarniutinik aningaasanoornermillu ajornartorsiuteqarnermi katsorsartinnerup nalaani suliffeerunnermi ikiorsiissutinik qinnuteqarsinnaanerannut tunngasoq
Aanngajaarniutinik, imaappoq imigassamik ikiaroornartumillu, aningaasanoornermillu ajornartorsiuteqarninnut ulluunerani katsorsartissaguit tamannalu pissutigalugu sulisinnaanngikkuit, katsorsartinnerpit nalaani Suliffeerunnermi ikiorsiissutit pillugit Inatsisartut inatsisaat nr. 2, 15. maj 2014-imeersoq naapertorlugu suliffeerunnermi ikiorsiissutinik qinnuteqarnissamut periarfissaqarputit.

Suliffeerunnermi ikiorsiissutit nammineq pisuussutiginngisamik suliffeerunnermik, angerlartitaanermik
nappaateqarnermilluunniit patsiseqartumik isertitanik annaasaqarnermut taartisiatut sulinermik inuussutissarsiuteqartunut tunniunneqartarput. Pinngitsuuisinnaajunnaarnerup nappaatitut isigineqarnera aanngajaarniutinillu atornerluisutut katsorsartinnerup inatsimmi nappaatitut allatulli katsorsartinnertut isigineqarnera pissutaalluni tamanna periarfissaavoq.

Qinnuteqarsinnaavutit:
1) 18-ileereersimaguit imaluunniit pilersuisuuguit nunatsinnilu inunnik nalunaarsuisarfimmi allattorneqarsimasunut ilaallutit najugaqaruit.
2) Sapaatip akunnerini kingullerni 13-ini sulinermik inuussutissarsiutilittut suliffeqarsimaguit piffissamilu tassani minnerpaamik nalunaaquttap akunnerini 182-ini akissarsiorsimaguit allanillu isertitaqarsimanngikkuit.

Pissarsisinnaassaguit:
1) Ulluunerani katsorsartittussaanerit tassalu ulluinnarni minnerpaamik nalunaaquttap akunnerini tallimani katsorsartinnissat pillugu kommunerisanni suliffissarsiuussisarfimmut saaffiginnissaatit.
2) Nakorsamit uppernarsaammik, piffissamut katsorsartinnissannut atuuttussamik nassassaatit.

Ikiorsiissutinik tunineqarnissamut pisinnaatitaaffeqarnerit kommunip naliliivigisassaraa.

Suliffeerunnermi ikiorsiissutit pillugit www.sullissivik.gl iserfigalugu annertunerusumik paasisaqarsinnaavutit.