airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Aanngajaarniutit pillugit amerlanerit katsorsartikkusuttut

Allorfiup ukiumoortumik nalunaarusiaa 2020-moortoq saqqummerpoq
18. maj 2021

Aanngajaarniutinik atuisartut innersuunneqartut amerlanerit – katsorsarneqartullu amerlanerit

Allorfik innuttaasunik imigassamik ikiaroornartumik aningaasanoornermillu ajornartorsiuteqartunik sullitaqartuuvoq. Allorfiup 2016-imi atuutilerneranit ukiut tamaasa innuttaasut katsorsartikkusullutik innersuunneqartut katsorsartittartullu amerleriartarput. 2020-mi inuit 952-t katsorsarneqarnissamut innersuunneqartut akornanni 725-it katsorsartinnerminnik aallartitsisimapput.

”Katsorsartinnissamik kissaateqartut taama amerlatigineri nuannaarutigaarput. Oqariartuutiginiarparput: Tikilluaqqusaavusi. Katsorsartinneq akeqanngilaq. Aanngajaarniutinik aningaasanoornermillu ajornartorsiuteqartut siusinaartumik katsorsarneqartarnissaat kissaatigaarput. Katsorsartittartut 40 % -iinnaat ukiut tallimat ikinnerusuniluunniit ajornartorsiuteqarsimasuusarput”, Allorfimmi pisortaq, nakorsaq Birgit Niclasen oqarpoq.

Ukiumoortumik nalunaarusiami takuneqarsinnaavoq, 25-init 34-t tikillugit ukiullit katsorsartikkusuttut aamma ukioq manna arnat inuusuttut amerlanerit saaffiginnissimapput. Imigassaq suli ajornartorsiutaaneruvoq, ikiaroornartup ajornartorsiutaanera aamma suli takussaavoq. Katsorsartittulli ataatsimut isigalugit 10 %-ip missaaniitut aningaasanoornermik ajornartorsiuteqartuullutik. Amerlasuut imigassamik ikiaroornartumillu ataatsikkut atuisuupput, ataasiakkaallu imigassamik ikiaaroornarmik aningaasanoornermillu ataatsimut atuisuullutik.

”Allorfimmi katsorsaasarneq coronap nalaani akimmisaartinnerpoq. Sulisutsinnik sinerissamiittunik ilinniartitseqqittarneq ukioq ataaseq sinnerlugu kinguaattooqqavoq. Pingaartumik immikkut eqqugaapput meeqqanut inuusuttunullu katsorsaanissamik neqeroorutigisassagut. Maannali Allorfinni sulisutta ilinniartinneqarnissaat ukiaru aallartissasoq neriuutigaarput”, Birgit Niclasen oqarpoq.

 

Amerlanerit illoqarfimminni katsorsarneqarput

Katsorsartittunit qulinit arfineq pingasut Allorfimmi imaluunniit angalallutik katsorsaasunit tikinneqarlutik najugarisartik qimannagu katsorsarneqartarput. ”Kommunit najugarisaq qimannagu katsorsaasoqarnissaanik kissaateqarnerat pisariaqartitsinerallu piviusunngortipparput. Najugaq qimannagu katsorsaasarneq 2021-ip ingerlanerani pitsanngorsaavigineqassaaq. Taassuma kinguneraa illoqarfiit Allorfe-qanngitsut tamangajammik angalallutik katsorsaasunit ukiumut marloriarlutik tikinneqartalermata” Birgit Niclasen nangilluni oqarpoq.

 

Amerlasuut arlaleriarlutik katsorsartittariaqartut

Katsorsartittut affai sinnerlugit siusinnerusukkut katsorsartereersimasuusarput. Ukiut siuliini aamma taamaassimavoq. ”Naatsorsuutigereerparput. Oqariartuutigaarput: Katsorsartinninni ilikkagaqarputit piareeruit katsorsartinnissannut ikiortissarsioqqissinnaavutit”, Birgit Niclasen oqarpoq nangillunilu ”Qujanartumilli amerlasuut aanngajaarniutinik atuiunnaarnissamik piumassuseqarlutik upperinninnerminnillu takutitsisartut naapittarpagut”.

 

Katsorsartinnerup nalaani inooriaaseq

Ukiumoortumik nalunaarusiami 2020-moortumi immikkut qulequtaavoq 2020-mi katsorsartissimasut katsorsartinnermi nalaani qanoq inooriaaseqarneri pillugit misissuineq.

Innuttaasunik katsorsaalluni aallartinnermi sapaatillu akunnerisa arfinillit qaangiunnerini inooriaatsiminnik allannguisimaneri pillugit apeqquteqarnikkut ingerlapparput.

Katsorsaaneq sapaatip akunnerini arfinilinni ingerlanneqartarpoq, Allorfinnili katsorsaaneq sivisunerulluni.

”Katsorsartittut sapaatip akunneri arfinillit qaangiunnerani pitsaannginnerusumik inuuneqalertarneri tupaallaatigilaarpaput. Katsorsartittut nukinnik atuisarneri misissuinitsinni takusinnaagatsigu taamatut inerneqarnera pissusissamisoorsoraarput,” Birgit Niclasen oqarpoq.

Timip perusussuseqarnera anigorniagassaasarpoq taamaannermilu nikallungaqqajaasoqarsinnaavoq. Inuttut qanoq issuseq qaratsap nassiussuuttagaasa sunnersinnaasarmagu. Inuunermilu pissuserisimasap takunissaa siunissamilu allatut ingerlanniarnissamut aalajangersimasumik eqqarsartariaaseqarnissaq sungiusaqqaaneqartussaavoq attanniarneqartussaallunilu. Inerniliunneqarpoq katsorsartereernerup kingorna tapersersorneqarnissamik pisariaqartitsisut amerlasut.

Katsorsaanermik naammagisimaarinninneq Ukiumoortumik nalunaarusiami immikkut qulequttatut tullertut  ilanngullugu sammineqarpoq, Allorfiit atuisunut naammagisimaarinninnermik akuttunngitsumik misissuititsisarput.

Ukiumoortumik nalunaarusiaq una toorlugu atuarsinnaavat. Atuisut isumaannik misissuinermi akissutit nittartakkami uani atuarsinnaavatit.