airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Katsorsaaneq iluaqutaavoq – aanngajaarniutinut ajornartorsiutaannarnuunngitsoq

Allorfiup ukiumoortumik nalunaarutaa 2021-moortoq saqqummerpoq.
22. juni 2022

Allorfiup 2021-mut ukiortumik nalunaarutaani takuneqarsinnaavoq aanngajaarniutinik ajortornartorsiuteqartunut, soorlu imigassamut, hashimut aamma aningaasanoornermut katsorsaaneq katsorsarneqartut ataasiakkaat inuunerminnik iluarisimaarinninnerannut pitsaasumik sunniuteqarluartartoq, soorlu aamma ilaqutariinnermi imminullu toqunnissamut ajornartorsiuteqarnernut annikillisitsisartoq.

Tamannalu Meeqqanut, Inuusuttunut, Ilaqutariinnermut Peqqissutsimullu Naalakkersuisup, Inuit Ataqatigiinneersup Mimi Karlsenip, nuannaarutigaa.

- Nuannaarutigaara tulluusimaarutigalugulu aanngajaarniutinik ajornartorsiuteqarnermut suliniutit iluatsittumik ingerlasut maanna takutissinnaaleratsigu, oqarpoq, nangillunilu:

- Katsorsaasut suliassinnut pitsaasumut sunniuteqartumullu qujanaq.

Katsorsarneqarluni aallartinnermi katsorsarneqartuni tamani agguaqatigiisillugu ulluni tallimani imertoqartarpoq, tamannali katsorsarneqareernermi qaammatit arfinillit qaangiunnerani ullut marluk affaanullu appartinneqarsimasarpoq. Matumanili katsorsarneqarsimanerminnik naammassinnissimasuni imernikinnerulertoqartarpoq katsorsarneqarsimanerminnik naammassinnissimanngitsunut sanilliullugu.

- Tamanna aamma atuuppoq katsorsarneqartoq katsorsarneqarnerminik naammassinnissimanngikkaluaraangat, sunniutaali tamakkiisumik katsorsarneqarsimasunut aamma utersaartoorsimanngitsunut soorunami annertunerusarpoq aamma katsorsartittut 80 procentii katsorsarneqarnerminnik naammassinnittarput, Allorfimmi pisortaq, nakorsaq Birgit Niclasen oqarpoq, nangillunilu:

- Nuannersortaa aamma unaavoq siornatigut katsorsarneqareersimasuni aatsaallu aamma katsorsartittuni naammassinnittartut amerlaqatigiimmata. Tamanna aamma pingaaruteqarpoq, amerlasuummi anguniakkamik angunissaanut arlaleriarlutik katsorsarneqarnissartik pisariaqartittarmassuk, Birgit Niclasen oqarpoq.

Katsorsarneqartunulli ataasiakkaanut aamma inuiaqatigiinnut angusaq pitsaanerpaaq tassaassavoq katsorsarneqarneq piffissami sivisunermi sunniuteqarpat.

- Paasivarput imigassamik aamma hashimik atuisunut katsorsaasarneq sunniuteqar-tartoq, kisianni aamma katsorsarneqarnerminnik naammassinnittunut suli pitsaanerusumik sunniuteqartartartoq, Birgit Niclasen oqarpoq.

Katsorsarneqarluni aallartinnermi katsorsarneqartuni tamani agguaqatigiisillugu ulluni tallimani imertoqartarpoq, tamannali katsorsarneqareernermi qaammatit arfinillit qaangiunnerani ullunut marlunnut affaanullu appartinneqarsimasarpoq. Matumanili aamma katsorsarneqarsimanerminnik naammassinnissimasuni imernikinnerulertoqartarpoq katsorsarneqarsimanerminnik naammassinnissimanngitsunut sanilliullugu.

Katsorsarneqarnerup sunniutaa

Innuttaasut atuinerminnut ernumanerat aamma taamatut pissutsinut allanut ernumassuteqarnerat aamma annikinnerulersarpoq, matumanili utersaartoqarsimannginnera aamma sunniuteqarnerpaajusarluni.

Katsorsarneqarlutik aallartittuni 84 procentit suliffeqarput. Taakkunani 29 procentit suliffeqarnerminnut atatillugu ajornartorsiutinut ernumassuteqarsimapput. Qaammatilli arfinillit qaangiunneranni katsorsarneqarlutik naammassisuni ernumassuteqartut 18 procentimut apparsimapput.

- Katsorsartittut uagutsinnut katsorsaasunut oqaluttuartarput sulisitsisumik katsorsartinnermik sunniutaat malugilluartaraat. Katsorsartittummi suliffimminnut tunniussimanerat nukissaqarfiginninnerulernerallu tusartarparput, Poul Møller-Heinrich, Allorfik Semersuu-mi aqutsisoq katsorsaasorlu oqarpoq, imalu nangilluni:

- Tupaallaatigilaakkatsinnillu innuttaasut pinerlunniartarnermik ajornartorsiuteqarnerat aamma appariaateqarpoq.

Ataatsimut isigalugu innuttaasut 25 procentii inuunermik ingerlaneranni pineqaatissinneqarsimasarput. Katsorsarneqarlutik naammassinnissimasut akornanni katsorsartereernerup kingorna qaammatit arfinillit qaangiunneranni pinerlunniartarnermut ajornartorsiuteqartut 4 procentiusimapput, katsorsarneqarnerup aallartinnerani 12 procentiusimallutik.

Ilaqutariinnermi ajornartorsiutinut aamma imminut toqunnissamut pissusilersuuteqartartunut sunniutaa

Aanngajaarniutinik ajornartorsiuteqarneq ilaqutariinnut sunniuteqarnerluttarpoq. Ilaquttanullu attaveqarluarnissamut ikiorneqarnissamik katsorsarneqartut amerlanersaat kissaateqartarput.

Katsorsarneqarnerup aallartinnerani katsorsarneqartut 46 procentii ilaqutariinnerminni ajornartorsiutinut imaluunniit aporaannernut ernumassuteqarsimapput. Taakkuali katsorsarneqarnerminnik naammassinnissimasuni qaammatit arfinillit qaangiunneranni 25 procentimut appariaateqarsimapput, naammassinnissimanngitsuni 34 procentimut appariaateqartoqarsimasoq.

Imminut nalileriaaseq naapertorlugu inuunerissaarnerulertoqarluni aamma naliliisoqarpoq, soorlu aamma pimoorussisumik imminut toqunnissamut eqqarsaateqarnerit imminnuulluunniit toqoriarnerit appariaateqartut. Katsorsarneqarluni aallartinnermit aamma katsorsarneqareerluni naammassinermi imminut toqunnissamut eqqarsaateqartut 23 procentimiit 13 procentimut appartut, imminut toqoriartut 8 procentimiit 5 procentimut apparput. Katsorsartereerlutik utersaartuunngitsuni imminut toqunnissamut eqqarsaatersuuteqarsimasut 18 procentiusut, utersaartoorsimasuni taamatut eqqarsaateqarsimasut 69 procentiupput.

- Utersaartuunnginneq imminut toqunnissamut eqqarsaateqarnermut imaluunniit imminut toqoriarnermut annerpaamik illersuutaasimavoq, Birgit Niclasen oqarpoq.

Allorfimmut katsorsarneqartussatut 2021-imi innuttaasut 948-it innersuunneqarput.

Allorfik Ilulissani, Aasianni, Sisimiuni, Nuummi aamma Qaqortumi katsorsaaveqarpoq.

Allorfiup ukioq 2021-mut nalunaarutaa pdf-nngorlugu ugguuna aasinnaavat.

Qallunaatut paasissutissiisinnaasoq:

Birgit V. Niclasen
Pisortaq, nakorsatut siunnersortit aqutsisuat

Allorfik, Pinngitsuuisinnaajunnaarnermik Paasisimasaqarfik
Tlf.: (+299) 34 66 52
E-mail: bivn@allorfik.gl

Kalaallisut paasissutissiisinnaasoq:

Poul Møller-Heinrich
 Aqutsisoq aamma katsorsaasoq

Allorfik Sermersooq
Mobil: (+299) 53 12 42
E-mail: pomo@nanoq.gl