Qanigisaasunut

Aanngajaarniutinik atornerluisut qanigisaat oqitsuinnaanngitsunik atugaqartarput. Allorfik aanngajaarniutinut atuisut qanigisaannut Allorfeqarfinni imaluunniit najugaq qimannagu katsorsaasoqarnerani qanigisaasunut katsorsaanermik aamma neqerooruteqarpoq.

Allorfiup atuisunut qanigisaasunut neqeroorutaa

Eqimattani ingerlanneqarnerusarpoq. Allorfimmi ingerlanneqartillugu peqataasoq siullermik kisimiitillugu oqaloqatigeqqaarneqartarpoq, tamatuma kingorna eqimattani sapaatip akunnerini arfineq-marlunni katsorsaaneq ingerlanneqartarpoq. Oqarasuaatikkut imlt. qarasaasiatigut attaviit iluaqutigalugit katsorsarneqarnissaq aamma periarfissaavoq.

Illoqarfiit ataasiakkaat Allorfimmit qanigisaasunut sapaatip akunnera sinnerlugu katsorsaanernik ingerlanneqarsinnaasunik katsorsaasoqarnissaanut aamma neqeroortitsisinnaapput.

Najugarisanni imlt. kommunerisanni Allorfik attavigisinnaavat qanigisaasunut katsorsaanerit pillugit.

Attavigitigut
Allorfimmut ulluinnarni nal. 9 aamma 15-ip akornanni oqarasuaat 52 53 43 sianerfigalugu sms-erfigaluguluunnit attaveqarsinnaavutit, imaluunniit katsorsartikkusukkuit katsorsartinnissamulluunniit periarfissatit pillugit apeqqutissaruit uunga mailerfigisinnaavatsigut: allorfik@allorfik.gl

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Najukkami katsorsaasoqarnerani qanigisaasunut neqeroorut

Najugaq qimannagu illoqarfinni katsorsaasoqartillugu qanigisaasunut katsorsaanerit ullut tamaasa ualikkut ulluni 14-ini ingerlanneqartarput. Najugaq qimannagu katsorsaanerni qanigisanik katsorsaanerit tamatigut eqimattani ingerlanneqartarput.

Qanigisaasutut najugaq qimannagu katsorsarneqarnissat kissaatigigukku, qanigisalli katsorsartittunut ilaanngippat, taava kommunerisanni sullissisut imaluunniit Allorfik, Pinngitsuuisinnaajunnaarnermik Paasisimasaqarfik peqataasinnaanernut neqeroortinniarlugit attavigissavatit.

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Inuusuttut aanngajaarniutinik ajornartorsiuteqartut angajoqqaavinut neqeroorut

Inuusuttut aanngajaarniutinik ajornartorsiuteqartillugit ilaqutariinnut ernumanermik uippakajaarnermillu malitseqartarpoq.

Allorfiup katsorsaavii inuusuttut aanngajaarniutinik ajornartorsiuteqartut angajoqqaavinut imaluunniit qanigisaannut eqimattani katsorsaanernik ingerlatsisarput.

Ikorfartoqatigiinni angajoqqaat ilittut atugaqartut aqqusaakkatik pillugit avitseqatigiittassapput. Atukkat kisermaallugit imaannaanngissinnaasartut pillugit. Misigissutsit sakkortuut ikorfartoqatigiinnut avitseqatigiiffiginissaannut periarfissiisoqassaaq, aamma iliuuserisartakkat siunertarineqartutut iluatsissimanngitsut pillugit isumassarsianik tunniussisoqarlunilu pissarsiffiusinnaassaaq, soorlu aamma allatut iliorsinnaanermut misiliisoqarsinnaassasoq.

Paasisaqarnerorusukkuit illoqarfigisanni Allorfik attavigiuk.

Allorfimmi katsorsaasutut kikkut naapitassaappat?

Allorfinni katsorsaasutut naapitassatit assingiinngitsunik ilinniagaqartuupput, soorlu perorsaasut, isumaginninnermi siunnersortit, peqqissaasut imalt. psykoterapeutit ilinniakkaminnik qaffassarlutik pinngitsuuisinnaajunnaarneq pillugu ilinniaqqinnikut.

Katsorsaasut tamarmik nipangiusimasussaatitaapput. Allorfiup avataani eqqartorusunngisatit oqaluttuarisinnaavatit. Katsorsaasut suliamut tunngatillugu allanik suleqateqarniarunik, assersuutigalugu kommunimi sullissisut, taava akuersissummik ilinniit peqqaarnissartik qinnutigeqqaartartussaavaat.

Arlaannik apeqqutissaqaruit, attaviginissatsinnut tikilluaqqusaavutit.

Allorfimmi takunissat qilanaaraarput.

Sooruna taanna neqeroorutaasoq?

Qanigisaq aanngajaarniutinik pinngitsuuisinnaajunnaarnermik ajornartorsiuteqarpat imminut tatigineq inuunerullu pitsaassusaa annikilliartorsinnaavoq. Taamaattumik qanigisaasut amerlasuut inuunerup pitsaanerulernissaanut ikiorneqarnissamik pisariaqartitsipput, aanngajaarniutillu ulluinnarni inituallaarunnaarnissaannut ikiortariaqarlutik.

Neqeroorutip siunertai

qanigisaasutut illit nammineq inuunerpit pitsaanerulernera.
qanigisavit katsorsartinnissaanut ikiuussinnaalissagavit.
qanigisat atueqqilissagaluarpat qisuariarnissannut sakkussaqalissagavit.

Attaveqarfissaq
Allorfiup Qaqortumi, Nuummi, Sisimiuni, Aasianni Ilulissanilu katsorsaavii kiisalu Allorfik, Pinngitsuuisinnaajunnaarnermik Paasisimasaqarfiup attavigineqarnissaannut paasissutissaataat uani nanisinnaavatit.