Siunissami nuna tamakkerlugu atornerluisunik katsorsaasalernissamut pilersaarutip inersimasunik aanngajaarniutinik atornerluinermik aningaasanoorajunnermillu ajornartorsiutilinnik akeqanngitsumik katsorsartissinnaanermut neqeroorummik nassuiaatitallip piviusunngortinneqarnissaa siunertaralugu Allorfik 2016-imi januaarip ulluisa aallaqqaataanni pilersinneqarpoq.

Allorfiup, Pinngitsuuisinnaajunnaarnermik Paasisimasaqarfittut akisussaaffigai:

• Pinngitsuuisinnaajunnaarnermut katsorsartinniartunut ukunnga innersuussinerit:
  Allorfik Avannaa (Ilulissat), Allorfik Kujalleq (Qaqortoq), Allorfik Qeqertalik (Aasiaat), Allorfik Qeqqata (Sisimiut) kiisalu Allorfik Sermersooq (Nuuk) uninngassutiginngikkaluarlugu ulluunerani ornigulluni oqaloqatiginnittarluni katsorsarneqarnermut sap. ak. 17-nit missaani ingerlanneqartartumut
  Nuummi Katsorsaavimmi sap. ak. arfinillit arfineq pingasullu akornanni ulluunerani katsorsartinneq imal. kommunit kissaataat naapertorlugu illoqarfinni najukkani katsorsartinneq
• Katsorsartereernermi ikorfartorneqarneq
• Ilaquttanik/qanigisanik katsorsaaneq
• Aanngajaarniutinik aningaasanoornermillu ajornartorsiuteqarnermi siunnersuineq
• Iliuuseqarnerup malittarineqarnera naliliivigineqarneralu

Anguniagassatut takorluukkat
Inuiaqatigiinni innuttaasut aanngajaarniutinik pinngitsuuisinnaajunnaarnermiit aningaasanoorajunnermiillu aniguisimasut angajoqqaallu meeqqamik pisariaqartitaannik isumaginnissinnaanermut piginnaanillit.

Suliassaq
Kalaallit Nunaanni aanngajaarniutit pillugit ajornartorsiutinik suliaqarnermi suliffeqarfittut nutaaliortutut ilinniagaqassutsikkullu piumasaqaatinik qaffasissunik eqquutitsisutut suleqatigisanut isaassisutut atuisutsinnullu ataatsimut isiginnilluni aaqqiissutinik qulakkeerisutut toqqammaviunissaq.

• Isumarput naapertorlugu ilinniagaqassutsikkut piumasaqaatinik qaffasissunik eqquutitsinermut tunngatillugu suliffeqarfiup ilisimatuussutsikkut paasisaanik tunngaveqarluni- innuttaasut ataasiakkaat pisariaqartitaat naapertorlugit- aanngajaarniutinik aningaasanoornermillu ajornartorsiuteqarnermut katsorsaanissaq tamatigut qulakkiigassaraarput. Katsorsaaneq sulisunit pisariaqartitamik ilinniarsimasunik pisarialimmillu ikorfartorneqartunit ingerlanneqarpoq.
• Isumarput naapertorlugu nutaaliornermut tunngatillugu atuisut inuiaqatigiillu pisariaqartitaat naapertorlugit suliffeqarfik ineriartussaaq. Suliatsinnut suli pikkorinnerulernissarput tamatigut anguniagaraarput.
• Isumarput naapertorlugu, tamakkiisumik isiginnilluni aaqqiissuteqarneq atuisunut- kissaatigisatut inuunerup angunissaanut iluaqutaanerpaamik ataatsimut neqeroorfigineqarnissaat qulakkeerniarlugu suliffeqarfimmiit suleqatigisat tamaasa isaassivigissavagut.
  

Naleqartitat
Peqqinneq timikkut tarnikkut inuttullu inooqataanermi iluarusunnertut allanngorartutut pitsaasumillu inuuneqarnissamut sakkussatut isigaarput. Aanngajaarniutinik ajornartorsiutitalimmik atuineq aningaasanoorajunnerlu nappaatitut isigineqarput ajornartorsiutitullu paasilertoruminaatsutut kingornussanit avatangiisiniillu katitikkatut isigineqarlutik.

Katsorsartinnissamut neqeroorut
Nunat tamalaat akornanni katsorsaariaatsimik pitsaassutsimut naapertuuttumik katsorsartinnissamut neqerooruteqarpugut. Tamanna sulisut ilinniartitaajuarnerat ikorfartorneqartuarnerallu aqqutigalugu qulakkeerneqarpoq.

Allanik suleqateqarneq
Suleqatitta tamarmik ilinniagaqassutsikkut piumasaqaatinik qaffasissunik eqquutitsisutut, tatiginartutut, neriorsuutinik eqquutitsisartutut, nutaaliortutut anguniagassanillu takorluuisinnaassusilittut isigigaatigut, sulisullu taama paasinnittariaatsip naapertuunnera misigaat.

Innuttaasunik katsorsaanermut tunngasut

• Innuttaasut katsorsaanerput sapinngisarlu tamaat aanngajaarniutinik aningaasanoorajunnermilluunniit ajornartorsiuteqarnerminnut pitsaanerpaamik ikiuussinnaanerput tatigisinnaavaat.
• Innuttaasut paasineqartutut tikilluaqqusaasutullu misigisimapput.
• Innuttaasut periarfissiissutaasut iluanni sapinngisaq tamaat malinnaaffigineqarnissartik ilisimavaat.
• Innuttaasut inuttut ataatsimoortutut immikkullu pisariaqartitsisutut isigaagut – tamannalu sulinitsinni aallaavigaarput.

Suliffeqarfittut
Aqutsisut peqataapput, ataqqinnittuupput piffissaagallartillugulu suliffeqarfimmut sulisunullu iliuuseqartarlutik.

Sulisut paasineqartutut misigisimapput ineriartornissamullu periarfissinneqarlutik.

Allorfiup aaqqissuussaaneranut assersuut ataani takusinnaavat:

Allorfiup aanngajaarniutit pillugit politikkia, Allorfimmi atorfilinnut tamanut, taartaagallartunut ilinniartunullu atuuttoq PDF-nngorlugu ugguuna aasinnaavat.

Allorfiup ukiumoortumik nalunaarusiai pdf-itut maani aasinnaavatit:

Ukiumoortumik nalunaarusiaq 2023

Ukiumoortumik nalunaarusiaq 2022

Ukiumoortumik nalunaarusiaq 2021

Ukiumoortumik nalunaarusiaq 2020

Ukiumoortumik nalunaarusiaq 2019

Ukiumoortumik nalunaarusiaq 2018

Ukiumoortumik nalunaarusiaq 2016-2017

Killiffik pillugu nalunaarut 2017 - Ilaqutariinnut naartusunut siusissukkut iliuuseqarneq

Kommunit
Allorfik kommunillu ataasiakkaat nalunaarusiaq Siunissami nuna tamakkerlugu atornerluisunik katsorsaasalernissamut pilersaarut naapertorlugu pinngitsuuisinnaannginnermut katsorsaaneq pillugu suleqatigiinnissamut isumaqatigiissuteqarpoq.

 Isumaqatigiissutini aaqqissuussaanikkut periutsit, allaffissornikkut ingerlatsinermi isumaqatigiissutit illuatungeriillu akornanni ulluinnarni suleqatigiinnermi suliassat aalajangersimasut agguarneqarnerisa nassuiarnissaat siunertaavoq.

Maannamut Kommuneqarfik Sermersooq Qeqqatalu Kommunia suleqatigiinnissamut isumaqatigiissuteqarfigineqarput.

Peqqinnissaqarfik
Siunissami nuna tamakkerlugu atornerluisunik akeqanngitsumik katsorsaasalernissamut pilersaarut naapertorlugu innuttaasunut pinngitsuuisinnaannginnermut atatillugu ajornartorsiutit saniatigut nakorsartinnerup naammassinissaannut kigaalaqusersuisinnaasumik nappaatilinnut tunngatillugu, suleqatigiinnissamut Peqqinnissaqarfimmut Allorfimmit isumaqatigiissuteqarfigineqassaaq.

Nakorsaatit atorlugit nakorsartinnerup tamatumunngalu atatillugu qaatussaanerup pinngitsuuisinnaannginnerullu kingunerluutitaannik katsorsaanerup isumaqatigiissummut ilanngunneqarnissaat Allorfiup kissaatigaattaaq.

Najukkami ulluuneranilu katsorsaaneq
Allorfiup illoqarfinni minnerni nunaqarfinni Nuummilu ullukkut katsorsaanermik isumaginninnissaq suliarinnittussarsiuuppaa. Tamatumunnga atatillugu Katsorsaavik Nuuk 2017-imiit 2019-imut katsorsaanernik qulaani pineqartunik isumaginnittussaq suleqatigiinnissamut isumaqatigiissuteqarfigineqarpoq.

Suliffeqarfiit
Suliffeqarfiit suleqatigiinnissamut Allorfimmut isumaqatigiissuteqarsinnaapput, tamatumuuna taakku kommunini sullissisutulli sulisuminnik pinngitsuuisinnaannginnermut katsorsartinnissamut innersuussisinnaanissaat periarfissinneqarpoq. katsorsartinnissap pilertortumik aallartinneqarsinnaanissaa siunertaavoq.

Maannamut suleqatigiinnissamut isumaqatiggiissusiorfigineqarpoq:
• Kofoeds Skole

2018-imi Nuummi suliffeqarfiit annerumaat 20-it pallittut Allorfiup neqeroorutaanik suleqatigiinnissamullu isumaqatigiissusiornissamut periarfissaqarneranik ilisimaarinninneq siammarterniarlugu Allorfimmit orninneqassapput. Taama isumaqatigiissusiornissaq kissaataappat, suliffeqarfiit soqutiginnittut Allorfimmut, pinngitsuuisinnaannginneq pillugu ilisimasaqarfimmut saaffiginnissinnaapput.

Suleqatigisat allat
• Odensimi Center for Ludomani
• Odensimi imigassamik ajornartorsiutilinnik katsorsaaneq
• Københavnimi U-turni
• Syddansk Universitetimi imigassaq pillugu ilisimatusarfik

Allorfik tassaavoq Pinngitsuuisinnaajunnaarnermik Paasisimasaqarfiup atia. Ateq Allorfik najukkani katsorsaavinni aamma atiutinneqarpoq.

Ilisarnaat eqqumiitsuliortumit Nina Kreutzmannimit titartarneqarpoq.

Ilisarnaammiipput aqqa Allorfik, nigalik titarnerlu qaarajuttoq.

Ilisarnaatip nigalittaata seqernup qaqqanit alakkaannera ersersippaa. Titarnerup kuuk imal. aqqut sangujoraartoq ersersippaa.

Ilisarnaat nukittussutsimik, aammali ammasuunermik inussiarnernermillu, kiisalu Allorfiup
inuunermut pitsaasumut pinngitsuuisinnaannginnermik ilaqanngitsumut aqqummi – naqinnerup i-p toorneranik seqinertut ersersitami, siullertut uniffiuneranik ersersitsissaaq.