Inuusuttunut

Allorfik inuusuttunut aanngajaarniutinik ajornartorsiuteqartunut arlalinnik neqerooruteqarpoq, aamma inuusuttunut aanngajaarniutinik ajornartorsiuteqarfiusumi peroriartorsimasunut.

Inuusuttunut aanngajaarniutinik ajornartorsiutilinnut eqimattat

Inuusuttut aanngajaarniutinik ajornartorsiuteqartut Allorfiup katsorsaaviini inuusuttunut immikkut eqimattaliani peqataanissaminnut periarfissaqarput.

Inuusuttut arfinillit, amerlanerilluunniit, taamatut ingerlatsinissamut soqutiginnippata eqimattat pilersinneqarsinnaapput.

Paasisaqarnerorusukkuit illoqarfigisanni Allorfik attavigiuk.

Inuusuttunut aanngajaarniutinik atuiffiusuni peroriartorsimasunut neqeroorut

Meeraanerput inuunitta sinneranut sunniuteqartussaavoq, taamaattumik ilaqutariinni aanngajaarniutinik ajornartorsiuteqarfiusumi peroriartorsimaneq tarnikkut ikilerneqarsimanermik nassataqarsinnaasarpoq.

Allorfik inuusuttunut aanngajaarniutinik atornerluiffiusumi peroriartorsimasunut eqimattanik immikkut ittumik neqerooruteqarpoq.

Paasisaqarnerorusukkuit illoqarfigisanni Allorfik attavigiuk.

Inuusuttut aanngajaarniutinik ajornartorsiuteqartut angajoqqaavinut neqeroorut

Inuusuttut aanngajaarniutinik ajornartorsiuteqartillugit ilaqutariinnut ernumanermik uippakajaarnermillu malitseqartarpoq.

Allorfiup katsorsaavii inuusuttut aanngajaarniutinik ajornartorsiuteqartut angajoqqaavinut imaluunniit qanigisaannut eqimattani katsorsaanernik ingerlatsisarput.

Ikorfartoqatigiinni angajoqqaat ilittut atugaqartut aqqusaakkatik pillugit avitseqatigiittassapput. Atukkat kisermaallugit imaannaanngissinnaasartut pillugit. Misigissutsit sakkortuut ikorfartoqatigiinnut avitseqatigiiffiginissaannut periarfissiisoqassaaq, aamma iliuuserisartakkat siunertarineqartutut iluatsissimanngitsut pillugit isumassarsianik tunniussisoqarlunilu pissarsiffiusinnaassaaq, soorlu aamma allatut iliorsinnaanermut misiliisoqarsinnaassasoq.

Paasisaqarnerorusukkuit illoqarfigisanni Allorfik attavigiuk.

Allorfimmi katsorsaasutut kikkut naapitassaappat?

Allorfinni katsorsaasutut naapitassatit assingiinngitsunik ilinniagaqartuupput, soorlu perorsaasut, isumaginninnermi siunnersortit, peqqissaasut imalt. psykoterapeutit ilinniakkaminnik qaffassarlutik pinngitsuuisinnaajunnaarneq pillugu ilinniaqqinnikut.

Katsorsaasut tamarmik nipangiusimasussaatitaapput. Allorfiup avataani eqqartorusunngisatit oqaluttuarisinnaavatit. Katsorsaasut suliamut tunngatillugu allanik suleqateqarniarunik, assersuutigalugu kommunimi sullissisut, taava akuersissummik ilinniit peqqaarnissartik qinnutigeqqaartartussaavaat.

Arlaannik apeqqutissaqaruit, attaviginissatsinnut tikilluaqqusaavutit.

Allorfimmi takunissat qilanaaraarput.

Nalunngiliuk...

Allorfik innutaasunut 15-lereersimasunut, aanngajaarniutinik aningaasanoornermillu ajornartorsiuteqartunut, katsorsaasarmat?

Allorfiup meeqqat inuusuttullu pillugit neqeroorutai allat

Allorfik meeqqat inuusuttullu pillugit allanik aamma neqerooruteqarpoq, taakkua uani annertunerusumik paasisaqarfigisinnaavatit:

PAS – aanngajaarniutinik pinaveersaartitsineq

Ulloq unnuarlu angerlarsimaffinnut neqeroorut

Ilinniarfinnut neqeroorut

Angajoqqaanik ataatsimiisitsinermi atortussiaq

Attaveqarfissaq
Allorfiup Qaqortumi, Nuummi, Sisimiuni, Aasianni Ilulissanilu katsorsaavii kiisalu Allorfik, Pinngitsuuisinnaajunnaarnermik Paasisimasaqarfiup attavigineqarnissaannut paasissutissaataat uani nanisinnaavatit.