Nalunngiliuk...
Nalunngiliuk? ...
Allorfik:
innuttaasumut akornusiinnginnerpaasumik, naleqquttumillu sunniuteqarsinnaasutut nalilerneqartumik katsorsaanermik neqerooruteqarmat.
innuttaasup angerlarsimaffianut sapinngisamik qaninnerpaasumi katsorsaasoqarnissaanut neqerooruteqarmat.
Pinngitsuuisinnaajunnaarnermik katsorsaasarneq pillugu Inatsisartut inatsisaat nr. 10 12. juuni 2019-imeersumi tamanna aalajangersagaavoq.
Indhold
Ukua arlaannik ajornartorsiuteqaruit katsorsartissinnaavutit:
Imigassaq
Hashi
Aningaasanoorajunneq
Allorfik innutaasunut 15-lereersimasunut, aanngajaarniutinik aningaasanoornermillu ajornartorsiuteqartunut, katsorsaasarpoq.
Katsorsartinnissannut qinnuteqarsinnaavutit sullissivik.gl-imiittoq immersugassaq immersorlugu. MitID pisariaqarpoq.
MitID-eqanngikkuit kommunerisanni nunaqarfiulluunniit allaffiani sullissisunnut saaffiginnissinnaavutit. Tassani pappilissamut immersuinissannut ikiorneqarsinnaavutit, taannalu Allorfimmut nassiunneqassaaq.
Allorfimmut toqqaannaq oqarasuaammut 34 14 51-mut sianerlutit katsorsarneqarnissannut aamma qinnuteqarsinnaavutit.
Katsorsarneqarfissat - sumi najugaqarnerit apeqqutaatillugu -aalajangerneqassaaq.
Illoqarfimmi Allorfilimmi najugaqaruit
Katsorsartinnissannut akornutaasinnaasumik peqquteqanngikkuit, illoqarfigisanni Allorfimmi katsorsarneqarnissannut neqeroorfigineqassaatit.
Katsorsarneqarnerit ima ingerlanneqarsinnaavoq:
ornigullutit oqaloqatiginninnikkut.
internetti aqqutigalugu.
oqarasuaatikkut.
Kommunerisanni, najugaqarfiginngisarnili, Allorfeqarpat
Kommunerisanni Allorfimmit katsorsarneqarnissannut neqeroorfigineqassaatit.
Katsorsarneqarnerit ima ingerlanneqarsinnaavoq:
internetti aqqutigalugu.
oqarasuaatikkut.
najugaq qimannagu illoqarfigisanni katsorsaasoqarnerani.
Katsorsaavik Nuummi.
Nunaqarfimmi najugaqaruit
Inunnik Isumaginnittoqarfimmi sullissisuppit kommunerisanni Allorfimmut innersuussinnaavaatit. Imaluunniit illit katsorsarneqarnissannut nammineerlutit www.sullissivik.gl -ikkut immersuisinnaavutit.
Katsorsarneqarnerit ima ingerlanneqarsinnaavoq:
internetti aqqutigalugu.
oqarasuaatikkut.
najugaq qimannagu kommunerisanni katsorsaasoqarnerani.
Katsorsaavik Nuummi.
Kommunerisanni najugaq qimannagu katsorsaasoqarnerani peqataanissat kissaatigigukku, taava kommunerisavit ineqartinneqarnissat il. il. isumagissavai, katsorsartinnerilli Allorfimmit akilerneqassalluni.
Aningaasanoornermik ajornartorsiuteqaruit
Center for Ludomani suleqatigalugu katsorsaasumit marluinnik oqaasilimmit internetti aqqutigalugu katsorsarneqarsinnaavutit.
Aanngajaarniutinik katsorsaanermik misilittagartooq aamma marluinnik oqaasilik, Center for Ludomani suleqatigalugu ilinnut aningaasanoornermik ajornartorsiuteqarninnit qaangeerusuttumut ikiuunnissaminut piareersimavoq.
Katsorsaaneq sap. akunneri qulit missaani sivisussuseqartarpoq, pisariaqartitsinerit naapertorlugu sap. akunneranut ataasiarlutit marloriarlutilluunniit oqaloqatiginnittassaatit. Oqaloqatiginninnerit tamarmik 45 minutsit missaanni sivisussuseqartarput.
Oqaloqatiginninnerit nammineq ornigunnikkut, oqarasuaatikkut imalt. internetti aqqutigalugu pisinnaapput.
Oqaloqateqarnerit siulliit (pingasut miss.) imarissavaat:
suna pillugu katsorsartinniarnertutit.
anguniakkat sunaanersoq, aamma qanoq angusinnaanerit.
Oqaloqateqarnerit tulliuttut (marluk miss.) imarissavaat:
inuuninni inissisimavippit killiffia.
Taanna katsorsartinnerpit ilusissaanut atugassaammat pingaaruteqarpoq.
Oqaloqateqarnitit tulliuttut:
eqqarsaatinut, misigissutsinut iliuutsinullu tunngapput.
kiisalu aanngajaarniutinut aningaasanoorajunnermullu qanoq allatut iliuuseqarsinnaanersutit ilinniartitsissutigineqassaaq.
Sap. ak. qulit missaat qaangiuppata:
katsorsartinnerit naammassissaaq.
anguniakkavit attatiinnarnissaa siunertaralugu katsorsartereernerpit kingorna allanik naapeqateqartarnissamut neqeroorfigineqassaatit.
Katsorsartereernerpit kingorna, Allorfimmi katsorsartissimasut allat peqatigalugit eqimattami oqaloqatigiinnernut peqataasalernissannik neqeroorfigineqassaatit. Tamanna katsorsartereernermi anguniakkavit attatiinnarnissaanut ikorfartuutissatut periarfissatut neqeroorutaavoq.
Allorfik katsorsartissimasunut katsorsaareernerup kingorna, sapaatip akunnerini 26-ni, eqimattani sapaatip akunneranut ataasiarluni, imaluunniit kisimiilluni sapaatip akunneri marluk imlt. sisamat allortarlugit , oqaloqateqarnissamut periarfissiisarpoq.
Najugarisanni Allorfeqanngippat, katsorsartereernippit kingorna ikorfartorneqarnissat pillugu kommunimi sullissisunnut, imaluunniit suliffippit Allorfik isumaqatigiissuteqarfigippagu, sulisitsisunnut saaffiginnissinnaavutit katsorsartereernerpit kingorna neqeroorummut periarfissatit pillugit paasiniaallutit.
Allorfiup katsorsaaviini oqaloqatigiinneq kajumilersitsisoq, inuullu nammineq imminut ajornartorsiutiminullu qanoq isumaqarnera qitiutillugu katsorsaariaaseq ingerlanneqartarpoq. Katsorsaavik Nuuk aqqutigalugu katsorsaaneq periutsinik Minnesota aamma CENAPS-imik aallaavilimmik ingerlanneqartarluni.
Allorfimmi katsorsaasut katsorsaariaasaat matuma kingorna annertunerusumik paasisaqarfigisinnaavatit.
Kajumissuseq pillugu oqaloqatiginninneq
Kajumissuseq pillugu oqaloqatiginninneq aalajangiiniarnermik – allannguiniarnermillu, inooriaatsimik allannguiniarnerni tamani ass. aanngajaarniutinik atuiunnaarnermi aningaasanoorunnaarnermilu aqqusaarneqartartumik aallaaveqarpoq.
Taamaammat kajumissuseq pillugu oqaloqatiginninnerup ileqqunik allannguinissamut aalajangernerup nukittorsarnissaa qiteraa. Katsorsaasup innuttaasoq peqatigalugu nammineq inuunermik allannguinissamut tunngavilersuutit paasiniarlugillu erseqqissassavai.
Kajumissuseq pillugu oqaloqatiginninneq sivisunngilaq, nalinginnaasumik sapaatip akunnialuinik sivisussuseqarluni, katsorsaanertut - imaluunniit katsorsartinnissaq sioqqullugu - Allorfimmi atorneqarnerisut atorneqarsinnaalluni.
Periutsip sunniutaa uppernarsaatissaqarluarpoq.
Inuup nammineq imminut ajornartorsiutiminullu qanoq isumaqarfiginera qitiutillugit katsorsaariaaseq
Inuup nammineq imminut ajornartorsiutiminullu qanoq isumaqarfiginera qitiutillugit katsorsaariaatsimi pisoq aalajangersimasoq piinnarnagu, pingaartumilli pisup aanngajaarniutinik atuilersitsisutut isumaqartinneqarnera tunngaviusumik eqqarsaataapput.
Taamaammat pissusissamisuunngitsumik pissusilersorneq allanngortinniaraanni annertuumik navianartorsiornerit suussusersinissaat pingaaruteqarpoq. Annertuumik navianartorsiornerit tassaapput soorlu assersuutigalugu aanngajaarniutinik atuiffiulersinnaasut.
Aanngajaarniutinik atornerluisunik katsorsaanermi inuup nammineq imminut ajornartorsiutiminullu qanoq isumaqarfiginera qitiutillugit katsorsaariaaseq aanngajaarniutinik atueriaatsip aamma /imal. aningaasanooriaatsip paasiniaavigineqarneranik aallarnerneqarajuppoq. Katsorsaasoq peqatigalugu ass. aanngajaarniutinik atuinermut atatillugu avatangiisit atuilersitsisuusartullu, attassiinnartitsisartut imal. annikillisitsisartut misissorneqassapput.
Inuup nammineq imminut ajornartorsiutiminullu qanoq isumaqarfiginera qitiutillugit katsorsaariaatsip sunniutai uppernarsarluagaapput.
Allorfinni katsorsaasut naapitassatit assigiinngitsunik ilinniagaqartuupput, soorlu perorsaasut, isumaginninnermi siunnersortit, peqqissaasut imalt. psykoterapeutit ilinniakkaminnik qaffassarlutik pinngitsuuisinnaajunnaarneq pillugu ilinniaqqinnikut.
Katsorsaasut tamarmik nipangiusimasussaatitaapput. Allorfiup avataani eqqartorusunngisatit oqaluttuarisinnaavatit. Katsorsaasut suliamut tunngatillugu allanik suleqateqarniarunik, assersuutigalugu kommunimi sullissisut, taava akuersissummik ilinniit peqqaarnissartik qinnutigeqqaartartussaavaat.
Imigassamut kingunerlutsitsinermut katsorsaanerit peqqinnissaqarfimmi isumagineqartarput. Taamaattumik kingunerlutsitsiguit kingunerlutsitsinernullu katsorsarneqarnissat pisariaqartikkukku najukkanni peqqinnissaqarfik attavigissavat.
Peqqissaaviit attaviginissaannut paasissutissat ugguuna takusinnaavatitit.
Allorfik katsorsaanermut neqerooruteqarpoq imigassartorusunnermut annikillisitsisinnaasumik kiisalu imigassap timimut pitsaasumik sunniuttarneranut annikillisitsisinnaasumik. Nakorsaatit atorneqartut ateqarput Acamprosat aamma Naltroxon.
Nakorsaatit atorlugit katsorsarneqarnissat kissaatigigukku Allorfeqarfik ilinnut qaninnerpaatut inissisimasoq attavigissavat.
Allorfik suliffeqarfinnut suleqatigiinnissamik isumaqatigiissuteqartarpoq, taamaalillutik suliffeqarfiit, inunnik sullissisut naligalugit sulisutik katsorsartinnissaannut innersuussusiorsinnaallutik.
Suliffeqarfimmi aqutsisuuguit Allorfimmullu suleqatigiissummik isumaqatigiissusiorusukkuit, Allorfik Pinngitsuuisinnaajunnaarnermik Paasisimasaqarfik saaffigisinnaavat.
Aningaasatigut siunnersuisartut takusinnaasatik naapertorlugit aningaasanoornermik ajornartorsiuteqartut ersiutaat allanit siulliullutik takusinnaasarpaat.
Allorfiup bankillu suleqatigiinneranni Allorfimmi sulisut bankimi sullissisunik aningaasanoornermik ajornartorsiuteqarneq pillugu ilinniartitsisarput, qanorlu iliorsinnaanermik sakkussanik tunioraasarlutik, kiisalu Allorfimmi katsorsartinneq qanoq imaqarnersoq, oqaloqatigiinnerullu qanoq ingerlasarnera pillugu paasissutissiissoqartarluni.
Taassuma saniatigut innuttaasoq aningaasanoornermik ajornartorsiuteqartoq katsorsartinnermini bankimi sulisumit siunnersortikkumassappat, Allorfimmi aamma Katsorsaavik Nuummi katsorsaasut bankini attaveqaateqarput.
Aangajaarniutinik aningaasanoornermillu ajornartorsiuteqarnermi katsorsartinnerup nalaani suliffissarsiortunut ikiorsiissutinik pissarsinissamut periarfissaq
Aanngajaarniutinik (imigassaq ikiaroornartorlu) imlt. aningaasanoornermut ajornartorsiuteqarninnut ulluunerani katsorsartissaguit, suliffissarsiortunut ikiorsiissutinik qinnuteqarnissamut periarfissaqarputit.
Taakkua tunniunneqarsinnaapput katsorsartinninni suliffiit paarisinnaanngikkukku.
Suliffissarsiortunut ikiorsiissutit Inatsisartut inatsisaat nr. 7, 20. juuni 2022-imeersoq naapertorlugu tunniunneqartarput. Pinngitsuuisinnaajunnaarnerup nappaatitut isigineqarnera pissutigalugu pisinnaatitaaffigaatit, taamatuttaarlu aanngajaarniutinik atornerluisunut katsorsaaneq nappaatinut allanut katsorsartinnermut nallersuunneqarmat.
Kikkut qinnuteqarsinnaappat?
Suliffissarsiortunut ikiorsiissutinik qinnuteqarsinnaavutit:
18-leereersimaguit
Nunatsinni najugaqaruit
Nunatsinni inuit allattorsimaffianni nalunaarsorsimaguit
Ulluunerani katsorsartikkuit (minnerpaamik nal. ak. tallimani)
Ima qinnuteqassaatit:
katsorsartinnissat nalunaarutigiartorlugu kommunerisanni Majoriamut saaffiginnissaatit
nakorsamit uppernarsaammik, piffissamut katsorsartinnissannut atuuttussamik nassassaatit
Ikiorsiissutinik tunineqarnissamut pisinnaatitaaffeqarnersutit kommunip tamatuma kingorna naliliivigissavaa.
Paasisaqarnerugit
Suliffissarsiortunut ikiorsiissutit pillugit www.sullissivik.gl iserfigalugu annertunerusumik paasisaqarsinnaavutit.
Allorfiit ilaat Mindfullnessertitsinermut sapaatip akunnerini arfineq-pingasunik sivisussuseqartartumut neqerooruteqarput.
Imminut ilisimaarinerulerneq aamma aanngajaarniutinut perusussuseqarneq peqataanermi annikillisinneqarsinnaavoq.
Peqataanermi piumasaqaatigineqartarpoq nammineq angerlarsimaffigisami mindfullnessernermik ullut tamaasa aamma ingerlatsisarnissaq.
Paasisaqarnerorusukkuit kommunerisanni Allorfik attavigiuk.
Mindfullnessernermi sungiusaatit angerlarsimaffimmi eqqissilluni atorneqarsinnaasut malittaralugit mediterersinnaavutit.
Periutsit aanngajaarniutinik pinngitsuuisinnaajunnaarsimasunik katsorsaanermi atorneqarsinnaapput.
Sungiusaatit sisamaapput, ilitsersuutitai mp3-tut tusarnaarneqarsinnaasunngorlugit ikkunnikuuagut. Nammineerlutit downloadersinnaavatit.
Timimik scannerineq
Siullermeerluni imaluunniit aappassaanik Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi sungiusarneqarsinnaavoq. 41 minutsinik sivisussuseqarpoq.
Sungiusaat ugguuna tusarnaaruk.
Issialluni meditererneq
Anersaartorneq, timi, nipit, eqqarsaatit aamma ammasumik meditererneq. Pingasoriarluni imaluunniit sisamariarluni Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi sungiusarneqarsinnaavoq. 38 minutsinik sivisussuseqarpoq.
Sungiusaat ugguuna tusarnaaruk.
Issialluni meditererneq (naanneq)
Anersaartorneq, timi aamma ammasumik meditererneq. Naanneruvoq aammalu pingasoriarluni imaluunniit sisamariarluni Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi atorneqarsinnaalluni. 18 minutsinik sivisussuseqarpoq.
Sungiusaat ugguuna tusarnaaruk.
Tasitsaarnermik sungiusaat
Tasitsaarnermik sungiusaat tallimariarluni imaluunniit arfineq-pingasoriarluni Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi tusarnaarlugu atorneqarsinnaavoq. 31 minutsinik sivisussuseqarpoq.
Sungiusaat ugguuna tusarnaaruk.
Tusarfik: www.mbrp.dk
Maani takusinnaavat illoqarfinni sorlerni najugaq qimannagu katsorsaasoqarniarnersoq:
Tasiilaq: 5. januaarimit - 13. februaarimut
Narsaq: 12. januaarimit - 20. februaarimut
Qaanaaq: 26. januaarimit - 6. marsimut
Qeqertarsuaq: 9. februaarimit - 20. marsimut
Ittoqqortoormiit: 2. marsimit - 20. marsimut
Tasiilaq: 4. maajimit - 12. juunimut
Tasiilaq: 17. aggustimit - 25. septembarimut
Tasiilaq: 2. novembarimit - 11. decembarimut