Katsorsaaneq

Imigassamik, hashimik aningaasanoornermilluunniit ajornartorsiuteqaruit Allorfimmi akeqanngitsumik katsorsartissinnaavutit.

Aanngajaarniutinik ajornartorsiuteqaruit ikiorneqarsinnaavutit

Ukua arlaannik ajornartorsiuteqaruit katsorsartissinnaavutit:

Imigassaq
Hashi
Aningaasanoorajunneq

Allorfik innutaasunut 15-lereersimasunut, aanngajaarniutinik aningaasanoornermillu ajornartorsiuteqartunut, katsorsaasarpoq.

Attavigitigut
Allorfimmut ulluinnarni nal. 9 aamma 15-ip akornanni oqarasuaat 52 53 43 sianerfigalugu sms-erfigaluguluunnit attaveqarsinnaavutit, imaluunniit katsorsartikkusukkuit katsorsartinnissamulluunniit periarfissatit pillugit apeqqutissaruit uunga mailerfigisinnaavatsigut: allorfik@allorfik.gl

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Katsorsaanerit uani ingerlanneqartarput

Allorfimmi katsorsaanermi tunngaviusumik uku malinneqartarput:

Illoqarfimmi Allorfilimmi najugaqaruit:
Illoqarfigisanni Allorfeqarpat, taava tassani katsorsarneqarnissannut neqeroorfigineqassaatit, katsorsartinnissannut akornutaasinnaasumik allamik peqquteqanngikkuit. Allorfimmi katsorsartinnerit ornigullutit oqaloqatiginninnikkut imaluunniit internetti oqarasuaallu atorlugu ingerlanneqarsinnaavoq.

Kommunerisanni, najugaqarfiginngisarnili Allorfeqarpat:
Taava kommunerisanni Allorfimmi katsorsarneqarnissarnut neqeroorfigineqassaatit. Katsorsaaneq internetti imaluunniit oqarasuaat atorlugu neqeroorutigineqassaaq.
Taamaattorli aamma najugaq qimannagu illoqarfigisanni katsorsaasoqarnerani katsorsartinnissarnut imaluunniit Nuummi Katsorsaavik Nuummut katsorsartikkiartornissarnut neqeroorfigineqarsinnaavutit.

Nunaqarfimmi najugaqaruit:
Nunaqarfimmi najugaqaruit Inunnik Isumaginnittoqarfimmi sullissisut aqqutigalugu kommunerisanni Allorfimmut innersuunneqarsinnaavutit. Katsorsarneqarnissat internetti imaluunniit oqarasuaat atorlugu ingerlanneqartussatut neqeroorutigineqassaaq. Kisianni aamma Nuummi Katsorsaavik Nuummut katsorsartikkiartornissannut neqeroorfigineqarsinnaavutit. Taakkua akerlianik kommunerisanni najugaq qimannagu katsorsaasoqarnissaani peqataanissat kissaatigigukku, taava kommunerisavit ineqartinneqarnissat il. il. isumagissavai, katsorsartinnerilli Allorfimmit akilerneqassalluni.

Aningaasanoorajuttuuguit:
Taava kommunerisanni Allorfimmi katsorsarneqarnissarnut neqeroorfigineqassaatit. Katsorsaaneq internetti imaluunniit oqarasuaat atorlugu neqeroorutigineqassaaq.
Taamaattorli aamma najugaq qimannagu illoqarfigisanni katsorsaasoqarnerani katsorsartinnissarnut imaluunniit Nuummi Katsorsaavik Nuummut katsorsartikkiartornissarnut neqeroorfigineqarsinnaavutit.

Allorfimmi sulisut katsorsartinnissaq ilinnut naleqquttoq neqeroorutigissavaat.

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Katsorsartereernerup kingorna neqeroorut

Katsorsartereernerpit kingorna, Allorfimmi katsorsartissimasut allat peqatigalugit eqimattami oqaloqatigiinnernut peqataasalernissannik neqeroorfigineqassaatit. Tamanna katsorsartereernermi anguniakkavit attatiinnarnissaanut ikorfartuutissatut periarfissatut neqeroorutaavoq.

Allorfik katsorsartissimasunut katsorsaareernerup kingorna sapaatip akunnerini 26-ani eqimattani sapaatip akunneranut ataasiarluni imaluunniit kisimiilluni sapaatip akunneri marluk imlt. sisamat allortarlugit oqaloqateqarnissamut aamma periarfissiisarpoq.

Aperineqarumaarputit
Katsorsarneqarnerit naammassilerukku aperineqarumaarputit katsorsartereernerup kingorna neqeroorummut ingerlaqqinnissarnut soqutiginninnersutit.

Katsorsartereernerup kingorna najugarisanni Allorfeqanngippat ikorfartorneqarnissat pillugu kommunimi sullissisunut imaluunniit suliffippit Allorfik isumaqatigiissuteqarfigippagu sulisitsisunnut saaffiginnissinnaavutit.

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Katsorsaariaatsit

Allorfiup katsorsaaviini oqaloqatigiinneq kajumilersitsisoq, inuullu nammineq imminut ajornartorsiutiminullu qanoq isumaqarnera qitiutillugu katsorsaariaaseq ingerlanneqartarpoq, Katsorsaavik Nuuk aqqutigalugu katsorsaaneq periutsinik Minnesota aamma CENAPS-imik aallaavilimmik ingerlanneqartarluni.

Allorfimmi katsorsaasut katsorsaariaasaat matuma kingorna annertunerusumik paasisaqarfigisinnaavatit.

Oqaloqatigiinneq kajumilersitsisoq
Oqaloqatigiinneq kajumilersitsisoq aalajangiiniarnermik – allannguiniarnermillu, inooriaatsimik allannguiniarnerni tamani ass. aanngajaarniutinik atuiunnaarnermi aningaasanoorunnaarnermilu aqqusaarneqartartumik aallaaveqarpoq.

Taamaammat oqaloqatigiinnerup kajumilersitsisup ileqqunik allannguinissamut aalajangernerup nukittorsarnissaa qiteraa. Katsorsaasup innuttaasoq peqatigalugu nammineq inuunermik allannguinissamut tunngavilersuutit paasiniarlugillu erseqqissassavai.

Oqaloqatigiinneq kajumilersitsisoq sivisunngilaq, nalinginnaasumik sapaatip akunnialuinik sivisussuseqarluni, katsorsaanertut - imaluunniit katsorsartinnissaq sioqqullugu - Allorfimmi atorneqarnerisut atorneqarsinnaalluni.

Periutsip sunniutaa uppernarsaatissaqarluarpoq.

Inuup nammineq imminut ajornartorsiutiminullu qanoq isumaqarfiginera qitiutillugit katsorsaariaaseq
Inuup nammineq imminut ajornartorsiutiminullu qanoq isumaqarfiginera qitiutillugit katsorsaariaatsimi pisoq aalajangersimasoq piinnarnagu, pingaartumilli pisup aanngajaarniutinik atuilersitsisutut isumaqartinneqarnera tunngaviusumik eqqarsaataapput.

Taamaammat pissusissamisuunngitsumik pissusilersorneq allanngortinniaraanni annertuumik navianartorsiornerit suussusersinissaat pingaaruteqarpoq. Annertuumik navianartorsiornerit tassaapput soorlu assersuutigalugu aanngajaarniutinik atuiffiulersinnaasut.

Aanngajaarniutinik atornerluisunik katsorsaanermi inuup nammineq imminut ajornartorsiutiminullu qanoq isumaqarfiginera qitiutillugit katsorsaariaaseq aanngajaarniutinik atueriaatsip aamma /imal. aningaasanooriaatsip paasiniaavigineqarneranik aallarnerneqarajuppoq. Katsorsaasoq peqatigalugu ass. aanngajaarniutinik atuinermut atatillugu avatangiisit atuilersitsisuusartullu, attassiinnartitsisartut imal. annikillisitsisartut misissorneqassapput.

Inuup nammineq imminut ajornartorsiutiminullu qanoq isumaqarfiginera qitiutillugit katsorsaariaatsip sunniutai uppernarsarluagaapput.

Allorfimmi katsorsaasutut kikkut naapitassaappat?

Allorfinni katsorsaasutut naapitassatit assigiinngitsunik ilinniagaqartuupput, soorlu perorsaasut, isumaginninnermi siunnersortit, peqqissaasut imalt. psykoterapeutit ilinniakkaminnik qaffassarlutik pinngitsuuisinnaajunnaarneq pillugu ilinniaqqinnikut.

Katsorsaasut tamarmik nipangiusimasussaatitaapput. Allorfiup avataani eqqartorusunngisatit oqaluttuarisinnaavatit. Katsorsaasut suliamut tunngatillugu allanik suleqateqarniarunik, assersuutigalugu kommunimi sullissisut, taava akuersissummik ilinniit peqqaarnissartik qinnutigeqqaartartussaavaat.

Arlaannik apeqqutissaqaruit, attaviginissatsinnut tikilluaqqusaavutit.

Allorfimmi takunissat qilanaaraarput.

Kingunerlutsitsinermut katsorsaaneq

Imigassamut kingunerlutsitsinermut katsorsaanerit peqqinnissaqarfimmi isumagineqartarput. Taamaattumik kingunerlutsitsiguit kingunerlutsitsinernullu katsorsarneqarnissat pisariaqartikkukku najukkanni peqqinnissaqarfik attavigissavat.

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Nakorsaatit atorlugit imigassamut katsorsaanerit

Allorfik katsorsaanermut neqerooruteqarpoq imigassartorusunnermut annikillisitsisinnaasumik kiisalu imigassap timimut pitsaasumik sunniuttarneranut annikillisitsisinnaasumik. Nakorsaatit atorneqartut ateqarput Acamprosat aamma Naltroxon. Nakorsaatit atorlugit katsorsarneqarnissat kissaatigigukku Allorfeqarfik ilinnut qaninnerpaatut inissisimasoq attavigissavat.

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Suliffeqarfinnik suleqateqarnermut isumaqatigiissutit

Allorfik suliffeqarfinnut suleqatigiinnissamik isumaqatigiissuteqartarpoq, taamaalillutik suliffeqarfiit, inunnik sullissisut naligalugit sulisutik katsorsartinnissaannut innersuussusiorsinnaallutik.

Suliffeqarfimmi aqutsisuuguit Allorfimmullu suleqatigiissummik isumaqatigiissusiorusukkuit, Allorfik Pinngitsuuisinnaajunnaarnermik Paasisimasaqarfik saaffigisinnaavat.

Innuttaasut aningaasanoornermik ajornartorsiuteqarneranni bankinik suleqateqarneq

Aningaasatigut siunnersuisartut takusinnaasatik naapertorlugit aningaasanoornermik ajornartorsiuteqartut ersiutaat allanit siulliullutik takusinnaasarpaat.

Allorfiup bankillu suleqatigiinneranni Allorfimmi sulisut bankimi sullissisunik aningaasanoornermik ajornartorsiuteqarneq pillugu ilinniartitsisarput, qanorlu iliorsinnaanermik sakkussanik tunioraasarlutik, kiisalu Allorfimmi katsorsartinneq qanoq imaqarnersoq, oqaloqatigiinnerullu qanoq ingerlasarnera pillugu paasissutissiissoqartarluni.

Taassuma saniatigut innuttaasoq aningaasanoornermik ajornartorsiuteqartoq katsorsartinnermini bankimi sulisumit siunnersortikkumassappat, Allorfimmi aamma Katsorsaavik Nuummi katsorsaasut bankini attaveqaateqarput.

Katsorsartinnerup nalaani suliffissarsiortunut ikiorsiissutit

Innuttaasut aangajaarniutinik aningaasanoornermillu ajornartorsiuteqarnermi katsorsartinnermik nalaani suliffissarsiortunut ikiorsiissutinik qinnuteqarsinnaanerat

Aanngajaarniutinik, imaappoq imigassamik ikiaroornartumillu, aningaasanoornermillu ajornartorsiuteqarninnut ulluunerani katsorsartissaguit, tamannalu pissutigalugu sulisinnaanngikkuit katsorsartinnerpit nalaani Suliffissarsiortunut ikiorsiissutit pillugit Inatsisartut inatsisaat nr. 7, 20. juuni 2022-imeersoq naapertorlugu suliffissarsiortunut ikiorsiissutinik qinnuteqarnissamut periarfissaqarputit.

Suliffissarsiortunut ikiorsiissutit nammineq pisuussutiginngisamik suliffeerunnermik, angerlartitaanermik, nappaateqarnermilluunniit patsiseqartumik isertitanik annaasaqarnermut taartisiatut sulinermik inuussutissarsiuteqartunut tunniunneqartarput. Pinngitsuuisinnaajunnaarnerup nappaatitut isigineqarnera aanngajaarniutinillu atornerluisutut katsorsartinnerup inatsimmi nappaatitut allatulli katsorsartinnertut isigineqarnera pissutaalluni tamanna periarfissaavoq.

Qinnuteqarsinnaavutit:
Suliffissarsiortunut ikiorsiissutinik pisartagaqarsinnaaneq tunngaveqassaaq pineqartup 18-inik ukioqalereersimaneranik, aalajangersimasumik najugaqartuuneranik aammalu Kalaallit Nunaanni inuit allattorsimaffiannut nalunaarsimaneranik.

Pissarsisinnaassaguit:

Ulluunerani katsorsartittussaanerit, tassalu ulluinnarni minnerpaamik nalunaaquttap akunnerini tallimani katsorsartinnissat pillugu kommunerisanni Majoriamut saaffiginnissaatit.
Nakorsamit uppernarsaammik, piffissamut katsorsartinnissannut atuuttussamik nassassaatit.

Ikiorsiissutinik tunineqarnissamut pisinnaatitaaffeqarnerit kommunip naliliivigisassaraa.

Suliffissarsiortunut ikiorsiissutit pillugit www.sullissivik.gl iserfigalugu annertunerusumik paasisaqarsinnaavutit.

Mindfulness aanngajaarniutinik pinngitsuuisinnaajunnaarnermi katsorsaanermi

Allorfiit ilaat Mindfullnessertitsinermut sapaatip akunnerini arfineq-pingasunik sivisussuseqartartumut neqerooruteqarput.

Imminut ilisimaarinerulerneq aamma aanngajaarniutinut perusussuseqarneq peqataanermi annikillisinneqarsinnaavoq.

Peqataanermi piumasaqaatigineqartarpoq nammineq angerlarsimaffigisami mindfullnessernermik ullut tamaasa aamma ingerlatsisarnissaq.

Paasisaqarnerorusukkuit illoqarfigisanni Allorfik attavigiuk.

Allorfiup katsorsaaviisa ataasiakkaat attaveqarfissaat ugguuna aamma takusinnaavatit.

Meditationernissamut ilitsersuutit

Mindfullnessernermi sungiusaatit angerlarsimaffimmi eqqissilluni atorneqarsinnaasut malittaralugit mediterersinnaavutit.

Periutsit aanngajaarniutinik pinngitsuuisinnaajunnaarsimasunik katsorsaanermi atorneqarsinnaapput.

Sungiusaatit sisamaapput, ilitsersuutitai mp3-tut tusarnaarneqarsinnaasunngorlugit ikkunnikuuagut. Nammineerlutit downloadersinnaavatit.

Timimik scannerineq
Siullermeerluni imaluunniit aappassaanik Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi sungiusarneqarsinnaavoq. 41 minutsinik sivisussuseqarpoq.
Sungiusaat ugguuna tusarnaaruk.

Issialluni meditererneq
Anersaartorneq, timi, nipit, eqqarsaatit aamma ammasumik meditererneq. Pingasoriarluni imaluunniit sisamariarluni Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi sungiusarneqarsinnaavoq. 38 minutsinik sivisussuseqarpoq.
Sungiusaat ugguuna tusarnaaruk.

Issialluni meditererneq (naanneq)
Anersaartorneq, timi aamma ammasumik meditererneq. Naanneruvoq aammalu pingasoriarluni imaluunniit sisamariarluni Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi atorneqarsinnaalluni. 18 minutsinik sivisussuseqarpoq.
Sungiusaat ugguuna tusarnaaruk.

Tasitsaarnermik sungiusaat
Tasitsaarnermik sungiusaat tallimariarluni imaluunniit arfineq-pingasoriarluni Mindfullnessertitsinermut sapaatip akunnerini arfineq-pingasunik sivisussuseqartartumi peqataareernermi angerlarsimaffimmi tusarnaarlugu atorneqarsinnaavoq. 31 minutsinik sivisussuseqarpoq.
Sungiusaat ugguuna tusarnaaruk.

Tusarfik: www.mbrp.dk

Najukkami 2024-mi katsorsaanissat

2024-mi ukiup affaa kingulleq:
Sumiiffik:	-mit:	-mut:
Uummannaq	11. nov.	20. dec.
Qaanaaq	11. nov.	20. dec.
Qeqertarsuaq	11. nov.	20. dec.
Narsaq	18. nov.	27. dec.

Najukkami 2025-mi katsorsaanissat

2025-mi ukiup affaa siulleq:
Sumiiffik:	-mit:	-mut:
Maniitsoq	13. jan.	21. feb.
Paamiut	13. jan.	21. feb.
Qasigiannguit	10. feb.	21. mar.
Tasiilaq	10. mar.	11. apr.
Narsaq	17. mar.	18. apr.
Nanortalik	24. mar.	2. maj
Kangaatsiaq	21. apr.	30. maj
Upernavik	5. maj	13. juni
Uummannaq	19. maj	6. juni
Qaanaaq	2. juni	11. juli
Paamiut	10. juni	18. juli
Maniitsoq	23. juni	1. aug.

2025-mi ukiup affaa kingulleq:
Sumiiffik:	-mit:	-mut:
Narsaq	21. juli	29. aug.
Qeqertarsuaq	4. aug.	12. sep.
Tasiilaq	18. aug.	26. sep.
Qasigiannguit	1. sept.	10. okt.
Kangaatsiaq	1. sept.	10. okt.
Upernavik	29. sept.	7. nov.
Ittoqqortoormiit	13. okt.	31. okt.
Uummannaq	20. okt.	28. nov.
Tasiilaq	10. nov.	19. dec.
Qeqertarsuaq	10. nov.	19. dec.

Nalunngiliuk...

Pinngitsuuisinnaajunnaarnermik katsorsaasarneq pillugu Inatsisartut inatsisaat nr. 10 12. juuni 2019-imeersoq naapertorlugu Allorfik ima neqerooruteqarmat:

Katsorsartinnermik neqeroorutaasoq innuttaasumut akornusiinnginnerpaasumik naleqquttumillu sunniuteqarsinnaasutut nalilerneqartoq neqeroorutigineqassaaq.
Katsorsartinnissamut neqeroorut sapinngisamik innuttaasup angerlarsimaffianut qaninnerpaaq neqeroorutigineqassaaq.

Katsorsartinneq ima ingerlasarpoq

Attaveqarfissaq
Allorfiup Qaqortumi, Nuummi, Sisimiuni, Aasianni Ilulissanilu katsorsaavii kiisalu Allorfik, Pinngitsuuisinnaajunnaarnermik Paasisimasaqarfiup attavigineqarnissaannut paasissutissaataat uani nanisinnaavatit.