Tamatumunnga tunngaviusoq tassaavoq kissaatigineqarsimammat angajoqqaat akornanni aanngajaarniutit pillugit ataatsimoorussamik isumaqatigiissusiortoqartarsinnaanera.
Tamannalu pingaaruteqarpoq, inuusuttummi siusissumik imertalersimappata imaluunniit ikiaroornartumik hashimik misiliisimappata, taava inuunerminni kingusinnerusukkut aanngajaarniutinik annertuumik atuilernissaminnut imaluunniit ajornartorsiuteqalernissaminnut qaninnerusarmata.
Inuusuttut aanngajaarniutit pillugit angajoqqaaminnik isumaqatigiissuteqartut, inuusuttunit aanngajaarniutit pillugit angajoqqaaminnik isumaqatigiissuteqanngitsunit, aanngajaarniutinik atuisarnerat annikinnerusoq paasineqarsimavoq.
Angajoqqaat imminnut isumaqatigiissuteqarsimatillugit inuusuttumut oqinnerusarpoq, inuusuttummi killissani paasisarmagit. Aamma angajoqqaajulluni oqinnerulersarpoq, paasineqartarpormi meerarisanut kisimiilluni killiliisuunani aamma kisimiilluni isumaaluginnittuunani.
- Uagummi aanngajaarniutinik atuisarnigut qanorluunniit ikkaluaraangata, taava meeqqatta ajunnginnerpaamik atugaqarnissaat kissaatigiuaannarparput, Birgit Niclasen, Allorfimmi pisortaq, taama oqarpoq, imalu nangilluni:
- Nalunngilarput aanngajaarniutinik atuineq “tuniluuttartoq”, taamaammat inuusuttup ikinngutai aanngajaarniutinik annertuumik atuisuuppata, taava aamma inuusuttup aanngajaarniutinik annertuumik atuinissaa ilimanaateqarpoq.
Kisitsit inuusuttut atueriaasiannik ersersitsisut
Inuusuttut qarasai aanngajaarniutinut, soorlu imigassamut hashimullu, sakkortuumik qisuariartarput. Tamanna pissuteqarpoq inuusuttuunermi inersimasunngulernermilu qarasaq ineriartortarmat.
- HBSC Greenlandimit misissuisarnernit nalunngilarput inuusuttut amerlasoorpassuit qaammammi kingullermi imigassartorsimasut aamma 16-inik ukiullit affangajai aalakoorneq misilinnikuusimagaat. Ikiaroornartoq eqqarsaatigalugu 16-inik ukiullit 17 procentiisa ikiaroornartoq hashi misilinnikuusimavaat aamma taakkua 10 procentii qaammammi kingullermi ikiaroornartumik hashimik pujortarsimapput, Birgit Niclasen oqarpoq.
Ukiut arlaqanngitsut siuliinut sanilliullugu ullumikkut pitsaanerusutut isikkoqaraluartoq, taamaakkaluartoq inuusuttoqarpoq imigassartortartunik aamma ikiaroornartumik hashimik pujortartartunik.
- Aamma nalunngilarput inuusuttut ullumikkut imigassamik ikiaroornartumillu pissarsinissartik ajornartorsiutigineq ajoraat. Tamanna aamma angajoqqaanit paasineqarnissaa pingaaruteqarpoq. Ajornanngitsumimmi pissarsisinnaanerup atuinerulerneq malitsigisarmagu, Birgit Niclasen oqarpoq.
Allorfik neriuppoq atortussiat atorneqarumaartut. Atortussiat Allorfiup nittartagaani aaneqarsinnaapput aamma Ilinniartitaanermut Aqutsisoqarfimmik suleqateqarpugut, taakkualu atortussaataanni aaneqarsinnaanngorumaarput.
Pilersaarutaavortaaq HBSC misissuereersimatillugu atortussiani paasissutissatut kisitsisaatigineqartut nutarterneqartarumaartut. Tamannalu ukioq manna aamma pissaaq, misissuinermi poorskip kinguninngua aallartittussaammat.
Angajoqqaanik ataatsimiisitsinermi atortussiaq ”Eqqartuisa” ugguuna aasinnaavat.