Aningaasanoornermik ajornartorsiuteqartut amerliartorput
2024-mi katsorsartittut 26 %-ii aningaasanoornermik ajornartorsiuteqarput. 2020-mut sanilliullugu 6 %-imik amerlanerupput.
Taama amerleriaateqarnerat naatsorsuutigineqareersimasutut oqaatigineqarsinnaavoq, internetti atorlugu aningaasanoortarneq annertuumik atugaaleraluttuinnarmat, aamma tamakkununnga takoqqusaarusiortarneq annertooq ingerlanneqarmat.
2024-mi innuttaasut aanngajaarniutinik annertuumik pinngitsuuisinnaajunnaarsimasut amerlanerit katsorsarneqarput, naak katsorsartittartut 2023-mi katsorsarneqarsimasut amerlaqataasut maanna aalaakkaasumik inissisimaleraluartut.
Katsorsartittut amerlasuut assigiinngitsunut pinngitsuuisinnaajunnaarnermik ajornartorsiuteqarput
Imigassamik ajornartorsiuteqarneq katsorsartinniarlutik saaffiginnittartut amerlanerpaat suli ajornartorsiutaanni initunersaavoq, kisianni amerlasuut tassunga ilutigitillugu hashimik aamma aningaasanoorajunnermik ajornartorsiuteqarput. Aanngajaarniutinut arlariinnut katsorsaasarneq akulikippoq.
Imigassamik ajornartorsiuteqarlutik katsorsartittut 36 %-ii aamma hashimut ajornartorsiuteqarput. Hashimik ajornartorsiuteqartut 64 %-ii aamma imigassamik ajornartorsiuteqarput. Aningaasanoornermik ajornartorsiuteqartut 35 %-ii aamma hashimik ajornartorsiuteqarput, taamattuttaarlu aningaasanoornermik ajornartorsiuteqartut 67 %-ii aamma imigassamik ajornartorsiuteqarlutik.
Affaat sinnerlugit siornatigut katsorsartereersimasuupput
Katsorsartittuni maanna siullerpaamik affai sinnerlugit – 54 %-it – siornatigut katsorsartereersimasuupput.
Allorfiup pisortaa, Efraim Olsen, oqarpoq:
“Aanngajaarniummik ajornartorsiuteqarneq anigoruminaatsuuvoq, taamaammat qujanaannarpoq amerlasuut ikiorneqaqqikkusullutik saaffiginneqqittarmata. Siornatigulli nalunngilarput katsorsartinneq innuttaasup inuunerani sorpassuartigut ajunngitsumik sunniuteqartartoq – soorunami pitsaasumik sunniuteqarnera annertunerussangaluarpoq katsorsarneqarnermi pitsaasumik naammassinninneq attanneqartuuppat”.
Naartusut amerlanngitsut katsorsartittarput
Ukiuni kingullerni tallimani arnat 92-it – tassa ukiumut 20-it ataallugit – Allorfimmi katsorsartissimapput.
Inuiaqatigiinni aanngajaarniutit ajornartorsiutigalugit atugaanerat eqqarsaatigalugu amerlanngillat, minnerunngitsumik naartuuneq aamma meeraaqqap inuunerani ukiut siulliit meeqqap inuunermini ineriartornissaanut isumaqarluinnarmata.
Arnat naartunngitsut assersuutigineranni naartusut katsorsarneqartut meeraanerminni artornarnerusunik atugassaqarlutik peroriartorsimapput. Tamanna ilisimatuussutsikkut paasisat tamarmik takutippaat.
Efraim Olsen oqarneratut:
“Allorfik 1. januar 2025-mit peqqinnissaqarfimmut ilaalermat suliassatta ilaat tassaassaaq Allorfiup suliniutaata aamma naartusunut kiisalu mikisunut angajoqqaajusunut isumassuinerup nukittorsarnissaa. Suleqatigiinnissaq qilanaaraarput."
Annertunerusumik paasissutissat: Allorfiup pisortaa, Efraim Olsen, oqarasuaat: 34 14 52, mail: efol@peqqik.gl
Ukiumoortumik nalunaarut: Allorfiup ukioq 2024-mut nalunaarutaa pdf-nngorlugu ugguuna aasinnaavat.