Innuttaasoq aanngajaarniutinut ajornartorsiuteqarluni katsorsartinnissaminik kissaateqaruni, taava 1. september 2025-mit nammineerluni imminut Allorfimmut Sullissivik aqqutigalugu innersuussinnaalerpoq.
Illit sullissisutut innuttaasoq Sullissivik aqqutigalugu immersuinerani ikiorsinnaavat. Aamma Allorfiup nittartakkamigut innersuussivia ukioq manna december 31-ata tungaanut suli atuukkallassaaq.
Sullissivik aqqutigalugu innersuussisalernikkut kommunit katsorsartereernerup kingornanut pilersaarusiornissamut pisussaaffiat atorunnaarpoq. Innuttaasoq katsorsartinnermini suliffeqarnikkut, aningaasaqarnikkut imaluunniit ineqarnikkut ajornartorsiuteqarnerarpat, taava kommunimut nalunaaruteqartoqartassaaq, aamma innuttaasoq kommunimut nammineq saaffiginneqqullugu piumaffigineqartassaaq.
Allorfiup innersuussivik nutaaq atuligaa pillugu apeqqutissaqarussi, Allorfimmi innersuussisartoq uunga mailerlusi apeqquteqarfigisinnaavarsi: visitation@peqqik.gl imalt. 34 14 51-mut nal.: 9 – 15 akornanni sianerfigalugu.