airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Angajoqqaanut ikorfartoqatigiiffik – Inuusuttumut aanngajaarniutinik ajornartorsiutilimmut angajoqqaajusunut neqeroorut

Allorfik Sermersooq aanngajaarniutinik ajornartorsiutilinnut angajoqqaajusunut ikorfartoqatigiinnik aallartitsilerpoq.
17. august 2022

Angajoqqaat Nuummi najugaqartut, inuusuttumullu aanngajaarniutinik ajornartorsiuteqartumut angajoqqaajusut, ukiap ingerlanerani angajoqqaaqatiminnik imminermisut atugaqartunik naapitsisarnissaminnut periarfissaqalerput.

Naapinnissaq siulleq:

Piffissaq: Sisamanngorneq 1. september nal. 17.00-imiit 20.00-imut
Sumiiffik: Allorfik Sermersooq, Nuukullak 8B, st. 001, 3900 Nuuk

Angajoqqaat ikorfartoqatigiiffianni angajoqqaat arfinilinniit qulinut amerlassusilinni peqataaffigineqartussami ilaassaatit, taakkua tallimariarlutik naapisinneqassapput. Ikorfartoqatigiit katsorsaasunit marlunnit aqunneqassapput oqaatsillu atorneqartussat kalaallisuujullutillu qallunaatuujussapput.

Ikorfartoqatigiinni angajoqqaat ilittut atugaqartut aqqusaakkatik pillugit avitseqatigiittassapput. Atukkat kisermaallugit imaannaanngissinnaasartut pillugit. Misigissutsit sakkortuut ikorfartoqatigiittunut avitseqatigiiffiginissaannut periarfissiisoqassaaq, aamma iliuuserisartakkat siunertarineqartutut iluatsissimanngitsut pillugit isumassarsianik tunniussisoqarlunilu pissarsiffiusinnaassaaq, soorlu aamma allatut iliorsinnaanermut misiliisoqarsinnaassasoq.

Ikorfartoqatigiit tallimariarlutik naapissapput. Qulequttanik immikkut sammisaqarluni sisamariarluni naapittoqassaaq, ullullu naapiffissat sapaatip akunnerinik marlunnik sisamanilluunniit akunneqartassapput, kingorna qaammatit pingasut qaangiunnerani inaarutaasumik naapeqatigiittoqarumaarluni. Ataatsimoortarnissat ualikkut nalunaaqutaq tallimaniit unnukkut arfineq-pingasup tungaanut pisassapput aamma annikikkaluartumik tamussiussassaqartarumaarpoq.

Naapiffissat allat ullui

Ullut naapiffissat allat tassaapput: marlunngorneq 20. september, marlunngorneq 18. oktober, aamma sisamanngorneq 3. november 2022.

Inaarutaasumik naapeqatigiinneq nalunaaquttap akunnerinik marlunnik sivisussuseqassaq, 2023-mi februaarip qaammataani ingerlanneqassaaq.

Angajoqqaanut ikorfartoqatigiiffittut taaguuteqaraluartoq, inersimasut allat inuusuttumut qanigisaasut peqataanissaminnut aamma tikilluaqqusaapput.

Peqataaneq akeqanngilaq, peqataarusukkuit ima iliussaatit:

Allorfik Sermersuumut mailerlutit allorfik.sermersooq@allorfik.gl  “Angajoqqaat ikorfartoqatigiit” qulequtaralugu, atit aamma telefonnormut nalunaarutigissavat, imaluunniit Allorfik Sermersuumut ulluinnarni nal. 9 - 15 akornanni uunga sianerlutit: 53 12 42.

 

Inussiarnersumik inuulluaqqusilluta

Allorfik Sermersooq