Allorfimmi katsorsaasut, nuna tamakkerlugu akeqanngitsumik aanngajaarniutinik pinngitsuuisinnaajunnaarnermut aningaasanoorajuttuunermullu katsorsaanermik isumaginnittuusut, katsorsaasoqatiminni pingasunik tarnikkut katsorsaasutut imminut taasinnaasunik ilaqalerput.
Tia Olsvig Fleischer (Allorfik Sermersooq), Tabitha Berthelsen aamma Karla Olsen (marluullutik Allorfik Qeqqatameersut) tarnikkut katsorsaasut ilinniarnertik modulikkaartoq naammassivaat.
Taakkua pingasuullutik tarnikkut katsorsaasutut ilinniarnertik katsorsaasutut sulinermik saniatigut ingerlappaat.
Tarnikkut katsorsaasutut tunuliaquteqalernermikkut nalaatat anigoruminaatsut inuunermilu atukkat oqimaatsut pillugit inunnik ataasiakkaanik, aappariinnik ilaqutariinnillu katsorsaanissamut piginnaaneqalerput.
Tamannalu Allorfiup pisortaanit, nakorsatut siunnersortimit, Birgit V. Niclasenimit nuannaarutigineqarpoq:
Pingasuullusi pilluaqqungaarpassi. Nalunngilara piffissap ilaani ilungersuasarsimasusi, nuannaarutigeqaarali tunniutiinnarsimannginnassi. Pilluaritsi, minnerunngitsumillu aamma uagut, oqarpoq.
Allorfik tallimanik katsorsaaveqarpoq, taakkunani katsorsaasunik aamma katsorsaasuujutigalutik aqutsisuusunik 25-nik sulisoqarpoq.
Saamerlermit: Karla Olsen (Allorfik Qeqqata), Tia Olsvig Fleischer (Allorfik Sermersooq) aamma Tabitha Berthelsen (Allorfik Qeqqata).