airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Angajoqqaanut Nuummi ikorfartoqatigiiffik

Allorfik Sermersooq aanngajaarniutinik ajornartorsiutilinnut angajoqqaajusunut ikorfartoqatigiinnik aallartitseqqilerpoq.
8. marts 2023
Angajoqqaat Nuummi najugaqartut, inuusuttumullu aanngajaarniutinik ajornartorsiuteqartumut angajoqqaajusut, angajoqqaaqatiminnik taamatulli atugaqartunik upernaap ingerlanerani naapitsisarnissaminnut periarfissaqalerput.
Naapinnissaq siulleq:
Piffissaq: Ataasinngorneq 27. marts nal. 17.00-imiit 20.00-imut
Sumiiffik: Allorfik Sermersooq, Nuukullak 8B, st. 001, 3900 Nuuk
Angajoqqaat ikorfartoqatigiiffianni angajoqqaat arfinilinniit qulinut amerlassusilinni peqataaffigineqartussami ilaassaatit, taakkua tallimariarlutik naapisinneqassapput. Ikorfartoqatigiit katsorsaasunit marlunnit aqunneqassapput oqaatsillu atorneqartussat qallunaatuujussapput, atortussalli amerlanerit kalaallisuunngortinneqarnikuupput.
Ikorfartoqatigiinni angajoqqaat ilittut atugaqartut aqqusaakkatik pillugit avitseqatigiittassapput. Atukkat kisermaallugit imaannaanngissinnaasartut pillugit. Misigissutsit sakkortuut ikorfartoqatigiittunut avitseqatigiiffiginissaannut periarfissiisoqassaaq, aamma iliuuserisartakkat siunertarineqartutut iluatsissimanngitsut pillugit isumassarsianik tunniussisoqarlunilu pissarsiffiusinnaassaaq, soorlu aamma allatut iliorsinnaanermut misiliisoqarsinnaassasoq.
Ikorfartoqatigiit tallimariarlutik naapissapput. Qulequttanik immikkut sammisaqarluni sisamariarluni naapittoqassaaq, ullullu naapiffissat sapaatip akunneranik ataatsimik pingasunnilluunniit akunneqartassapput, kingornalu qaammatip ataatsip qaangiunnerani inaarutaasumik naapeqatigiittoqarumaarluni. Ataatsimoortarnissat ualikkut nalunaaqutaq tallimaniit unnukkut arfineq-pingasup tungaanut pisassapput aamma annikikkaluartumik tamussiussassaqartarumaarpoq.
Naapiffissat allat ullui
Ullut naapiffissat allat tassaapput: marlunngorneq 14. april, sisamanngorneq 27. april, aamma ataasinngorneq 8. maj.
Inaarutaasumik naapeqatigiinneq nalunaaquttap akunnerinik marlunnik sivisussuseqassaq, taannalu ataasinngornermi juunip 19-ani pissalluni.
Angajoqqaanut ikorfartoqatigiiffittut taaguteqaraluartoq, inersimasut allat inuusuttumut ulluinnarni qanigisaasut peqataanissaminnut aamma tikilluaqqusaapput.
Peqataaneq akeqanngilaq, peqataarusukkuit ima iliussaatit:
Allorfik Sermersuumut mailerlutit allorfik.sermersooq@allorfik.gl “Angajoqqaat ikorfartoqatigiit” qulequtaralugu, atit aamma telefonnormut nalunaarutigissavat, imaluunniit Allorfik Sermersuumut ulluinnarni nal. 9 - 15 akornanni uunga sianerlutit: 53 12 42.
Kingusinnerpaamik nalunaarfissaq tassaavoq marsip 24-at nal. 15.00.