Aanngajaarniutini imigassaq aningaasanoornerlu katsorsartinniartuni suli ajornartorsiutaagajunnerupput. Tulliullutik hashimik aningaasanoornermillu ajornartorsiuteqartut. Innuttaasulli katsorsartittut amerlasuut ataatsikkut arlalinnik ajornartorsiuteqarput. Imigassamik ajornartorsiuteqartut 31 %-it hashimik aamma ajornartorsiuteqarput, innuttaasullu hashimik ajornartorsiuteqartut 76 %-it imigassamik aamma ajornartorsiuteqarlutik.
2016-imi Allorfik pilersinneqarmalli, pernaammik katsorsartittut 2022-mi ikileriarput. Tamanna ukiup qaammataani siullerni naliliivigineqareerlutik innersuunneqartut, Covid-19-ip nappaalatitsinera pissutaalluni ikittuararsuunerannik patsiseqarpoq, tamatumalu kingorna amerleriaraluit, 2021-imiit ikinnerupput, aammali Allorfiup naliliivigineqarlutik innersuussinermut qarasaasiakkut sullississutaata, 2022-mi upernaakkut Namminersorlutik Oqartussat qarasaasiaasa saassunneqarnerannik - allanittaarlu patsiseqartumik atorsinnaajunnaarnerannik patsiseqarluni.
2022-mi Allorfimmit naliliivigineqareerlutik katsorsartinnissamut innersuunneqarput innuttaasut 753-it, taakkunanngalu 543-t katsorsartillutik. Taamaalillutik innuttaasut suli amerlaqisut, aanngajaarniummik imal. aningaasanoornermik ajornartorsiumminnut katsorsartinnissartik kissaatigaat. 2022 naalersoq 18 %-it suli katsorsartipput, 61 %-it naammassillutik 21 %-illu maanaannaq taamaatillutik. Arlallit ukiup naanerani suli katsorsartinnerannut tunuliaqutaasoq tassaavoq, 2021-mut sanilliullugu 2022-mi amerlasuut kingusissukkut katsorsartilernerat.
Kommuninik suleqateqarneq ukkanneqarpoq
2022-mi ukiumoortumik nalunaarusiami immikkut ukkanneqartoq tassaavoq Allorfiup innuttaasut najugaanni kommuuninik suleqateqarnermi, pinngitsuuisinnaajunnaarnermik katsorsaasarneq pillugu Inatsisartut inatsisaat nr. 10, 12. juni 2019-imeersoq naapertorlugu iliuusissanik, pinngitsuuisinnaajunnaarnermut katsorsartinnerup anguniakkatut sunniuteqarsinnaanissaanut piumasaqaataasumik pilersaarusiornissamut pisussaaffeqarnera.
Tamanna ilaatigut inuttut atukkanut, suliffeqarnermut allatigullu suliniutinik, katsorsartinnerup ingerlanerani suliassanik nassuiaasunik, kommunit katsorsartereernerup kingorna pisussanut pilersaarusiornissaannik isumaqarpoq.
Innuttaasut 2021-mi 2022-milu katsorsartereernerup kingorna pisussanut pilersaarusiuunneqartussatut nalunaarsimasut 36 %-iisa pilersaarusiuunneqarsimannginnerat, 2022-mi ukiumoortumik nalunaarusiami kisitsisit nutaat takutippaat.
Tamannalu Allorfiup pisortaanit nakorsamit Birgit Niclasenimit ernumanartutut isigineqarpoq:
-Innuttaasoq katsorsartinneq naammassigaangat annertuumik sanngiiffilimmik nutaamik aanngajaarniutinik atuisuunngitsutut kinaassuseqalerajuppoq. Pingaartumik innuttaasoq katsorsartinnissi sioqqullugu inuttut atukkatigut, aningaasaqarnikkut aamma/imal. suliffeqarnikkut ajornartorsiuteqarpat, kinaassuseq nutaaq taanna attakkuminaappoq, pisortaq oqarpoq.
Allorfik aamma katsorsartereernerup kingorna pisussanut pilersaarusiortarpoq
Innuttaasut Allorfimmiittut tamakkerlutik kommunip isumaginnittoqarfianit ilisimaneqartanngillat, kommunillu innuttaasunik pisariaqartitsinerusunik pingaarnersiuisinnaaqqullugit, innuttaasunut Allorfimmi katsorsartittunut meeraqanngitsunut, suliffeqartunut, ineqartunut aningaasaqarnikkullu pinasuagassamik tatineqanngitsunut, katsorsartereernermi pisussanut taartissamik pilersaarusiornissaq 2021-mi Allorfimmit toqqarneqarpoq.
2021-mi 2022-milu naliliivigineqareerlutik innersuussat 35 %-iinut katsorsartereernermi pisussanut taartissamik pilersaarusiat, Allorfimmit suliarineqarput.
2023-mi kommuninik qaninnerusumik suleqateqarnissaq suliniutaassaaq
Allorfik Inatsisartut inatsisaat nr. 10, 12. juni 2019-imeersoq naapertorlugu kommuninik Peqqinnissaqarfimmillu, suleqatigiinnissamut pingaarnertut isumaqatigiissusiornissamut, najukkanilu suleqatigiinnermik pilersitsinissamut pisussaaffeqarpoq. 2023-mi suleqatigiinnissamut isumaqatigiissutinik nutarterinikkut najukkanilu suleqatigiinnikkut, kommuninik Peqqinnissaqarfimmillu suleqateqarneq Allorfimmit nukittorsarneqassaaq.
Tamatuma saniatigut, innuttaasup attavikkut isumannaatsukkut nammineq oqarasuaatini angallattagaq atorsinnaallugu, videokkut oqaloqatigiilluni katsorsartinnissamut pitsaanerusumik periarfissaqarnissaa, Allorfimmit suliniutaavoq.
Katsorsartinniaraanni attavissaq: Allorfik mailikkut allorfik@allorfik.gl imal. oqarasuaatikkut: 525343 imal. najukkanni Allorfimmut toqaannartumik attaveqarnikkut.
Allorfik Ilulissani, Aasianni, Sisimiuni, Nuummi Qaqortumilu katsorsaaveqarpoq, illoqarfinnilu tamani ukiumut marloriarluni, kiisalu Nuummi ineqarluni katsorsaanissanik neqerooruteqarluni.
Attavissaq: Birgit Niclasen, bivn@allorfik.gl, imal. Efraim Olsen, efol@nanoq.gl, oqarasuaat 52 53 43
Ukiumoortumik nalunaarut: Allorfiup ukioq 2022-mut nalunaarutaa pdf-nngorlugu ugguuna aasinnaavat.