Misissuinerup takutippaa kalaallit katsorsaaviini katsorsaasut innuttaasunut sullissinerminni neqeroorutaasunut katsorsaariaatsinullu atorneqartunut iluarisimaarinnittut. Akerlianilli aanngajaarniutinik ajornartorsiutilinnut katsorsaanermi tamakkiisumik isiginnittaaseqarluni aanngajaarniutinik ajornartorsiuteqartunut pitsaanerusumik periarfissaqarluni katsorsaasoqartarsinnaaneranut ujartuipput. Innuttaasummi amerlasuut inuunerminni aanngajaarniutaannaanngitsunik ajornartorsiuteqarput, soorlu ineqarniarnermikkut, aningaasaqarnermikkut imaluunniit peqqissutsimikkut imaluunniit inuttut qanigisaminnut attaveqarnerminni aamma inuunerminni siusinnerusukkut nalaattarsimasaminnik kingunerlutsitsisuusinnaallutik. Katsorsaasullu misigisarpaat innuttaasut tamakkiisumik isiginnittaaseqarluni iliuuseqarfiginissaat ajornakusoorsinnaasartoq.
Taamaattumik katsorsaasut arlallit kissaateqarput tamakkiisumik isiginnittaaseqarluni katsorsaasoqarnerulissasoq, kommunit aamma peqqinnissaqarfik siammasissumik suleqatiginerisigut. Innuttaasummi ajornartorsiutaannik arlalinnik ataasiartumik ikiuerusuttaraluarput, kisianni akulikitsumik misigisarlugu kommuninik suleqateqarniarnerup ajornartorsiutaanera, taakkuugaluarmatami pissutsinnut assigiinngitsunut ikiuunnissaminnut inatsisitigut akisussaaffeqartut.
”Katsorsaasut pisussaaffigalugu iliuuserisinnaasaat aamma allatut iliuusererusussinnaasaat missorluarusunnarsinnaavoq. Taannami immaqa tikkuussisuusinnaavoq nunami maani innuttaasut tamakkiisumik isiginnittaaseqarluni ikiorsiiffigineqarnissaannut”Kamilla Nørtoft, SDU-mi Afdeling for Folkesundhed i Grønlandimi ilisimatusartuuneq taama itisiliivoq. ”Taamaammat neriuutigaarput misissuisimaneq oqartussaaffiit assigiinngitsut tamakkiisumik isiginnittaaseqarluni innuttaasunut iluaqutaasumik neqerooruteqartoqalernissaanut oqaloqatigiinnilerulernissaannut aqqutissiuussisinnaasoq”, Kamilla Nørtoft naggasiivoq.
Misissuinerup inerneri Allorfiup katsorsaaviini siunissami katsorsaariaatsip ineriartorteqqinneqaqqinnissaani ukkatarineqartussanngorlugit inissinneqassapput. Nalunaarusiaq suliarineqarpoq katsorsaasut aamma katsorsaasut aqutsisui katillugit 16-it Allorfiup katsorsaaviini tamani (Aasiaat, Sisimiut, Nuuk, Ilulissat aamma Qaqortoq) suliffeqartut apersorneqarsimanerat tunngavigalugu.
Aanngajaarniutinik ajornartorsiuteqartunut katsorsaaneq pinaveersaartitsisuullunilu inuit aanngajaarniutinik ajornartorsiuteqartut inuunermut allaanerusumut pitsaanerusumullu inuuneqalernissaannut ikiorsiissutaasarpoq. Aanngajaarniutinik ajornartorsiuteqartunut katsorsaaneq inuiaqatigiit tamarmik aamma susassaqarfigivaat, inuimmi ataasiakkaat ajornartorsiutiminnik katsorsarneqarnerat allarpassuarnut aamma sunniuteqartarmat. Katsorsaaneq iluatsilluartoq kikkunnut tamanut iluaqutaasarpoq. Inersimasunut aanngajaarniutinik aningaasanoorajunnermillu ajornartorsiuteqartunut akeqanngitsumik katsorsaasoqartarnissaa siunertaralugu Allorfik 2016-imi januaarip aallaqqaataanit atuutilermalli innuttaasut ukiumut 500-700 missaanniittut Allorfiup nunap immikkoortortaani katsorsaaviini katsorsarneqarlutik naammassinnittarput. Katsorsaasullu Allorfimmi suliaminnut isiginnittariaasiat pillugu maanna aatsaat siullermeerluni misissuisoqarpoq.
Nalunaarusiaq ugguuna aaneqarsinnaavoq: Katsorsaaneq katsorsaasut isaannit isigalugu 2023
Allorfik pillugu:
Allorfik Ilulissani, Aasianni, Sisimiuni, Nuummi aamma Qaqortumi katsorsaaveqarpoq.
Imigassamik, hashimik aningaasanoornermilluunniit ajornartorsiuteqaruit, katsorsaanermilu peqataarusukkuit, taava Allorfimmut 52 53 43 sianerit imaluunniit najugarisanni kommunimut saaffiginnigit. Katsorsartinneq akeqanngilaq.
Allorfik qarasaasiakkut attaviit iluaqutigalugit katsorsaanernik aamma ingerlatsisinnaavoq.