Imigassamik ajornartorsiuteqarneq katsorsartinniarlutik saaffiginnittartut amerlanerpaat suli ajornartorsiutaanni initunersaavoq, aanngajaarniutilli arlallit ajornartorsiutigineqartarneri akulikipput. Innuttaasummi katsorsartilersut 79%-ii hashimik ajornartorsiuteqartut aamma innuttaasut katsorsartilersut 78%-ii aningaasanoornermik ajornartorsiuteqartut aamma imigassamik ajornartorsiuteqarsimammata.
Innuttaasut najugaqarfigisaannut qanittumi katsorsaasoqartarnissaanut periarfissanik ataavartumik neqeroortoqartuartarpoq, taamaalilluni 2023-mi innuttaasut katsorsartilersut 87%-ii illoqarfigisaminni katsorsarneqarlutik aallartissinnaasimapput.
- Siunissaq ungasinnerusoq eqqarsaatigalugu neriuppugut innuttaasut amerlanerit katsorsartinnissaminnut siusinnerusukkut toqqaasarumaartut, Allorfiup pisortaa, Efraim Olsen, oqarpoq.
2023-mi innuttaasut katsorsartittut affaat aanngajaarniutinik ajornartorsiuteqalernerminnit ukiut tallimat qaangiunneranni katsorsartinniarlutik qinnuteqarput.
Allorfiup atuutilersinneqarneranik naliliineq
Aanngajaarniutinut ajornartorsiuteqarluni sivisuumik imminullu piumaffiginartumik katsorsartinnermi ikerinnakkut unitsitsisoqartuaannarpoq.
Ukioq 2022-mut sanilliullugu katsortittarnerminnik naammassinnittartut ikileriaateqarsimasut malunnarpoq, tamannalu innuttaasut katsorsarneqarnermik saniatigut inunnik isumaginnittoqarfimmit immikkut pisariaqartitsisut naammassinnissinnaannginnerannut ersiutaagunarluni.
Taama ineriartorneq ingerlasoq ernumanaateqarpoq, innuttaasummi amerlasuut katsorsartillutik aallartittartut angerlarsimasunik suli meerartaqarmata.
Ukioq 2023-mi immikkut sammineqarpoq Allorfiup pilersinneqarsimanera aamma suliarisimasat. Ph. d.-nngorniutigalugu suliap ersersippaa Allorfiup ataatsimut isigalugu pilersinneqarsimanera iluatsissimasoq, taamatullu aamma katsorsaasarnerup ukiup ingerlanerani pitsanngoriartorsimanera.
Ukiumoortumik nalunaarut:
Allorfiup ukioq 2023-mut nalunaarutaa pdf-nngorlugu ugguuna aasinnaavat.