Allorfimmi katsorsaanermi tunngaviusumik uku malinneqartarput



• Illoqarfimmi Allorfilimmi najugaqaruit, nalinginnaasumik tassani katsorsartinnissannik neqeroorfigineqassaatit. Katsorsartinneq takkunnikkut Skypekkut telefonikkulluunniit pissaaq, sapaatip akunnerini qulini ingerlanneqartarpoq. Sapaatip akunneranut ataasiarlutit marloriarlutilluunniit oqaloqateqartassaatit.

• Najukkanni Allorfeqanngippat, Katsorsaavik Nuuk suleqatigalugu katsorsaasunik najugaq qimannagu katsorsartissinnaanissannik neqeroorfigineqassaatit.

• Aningaasanoornermik ajornartorsiuteqarsimaguit Center for ludomanimi katsorsartinnissannut periarfissaqarputit. Tamanna Odensemi Skypekkulluunniit ingerlassinnaavat. Tassani katsorsaaneq ullut 11-t ingerlanneqartarpoq, qallunaatullu oqalussinnaanissat piumasaqaataavoq.

Allorfimmi sulisut katsorsartinnissaq ilinnut naleqquttoq neqeroorutigissavaat.

Katsorsartereernerpit kingorna, Allorfimmi katsorsartissimasut allat peqatigalugit eqimattami oqaloqatigiinnernut peqataasalernissannik neqeroorfigineqassaatit. Tamanna katsorsartereernermi anguniakkavit attatiinnarnissaanut ikorfartuutissatut periarfissatut neqeroorutaavoq.

Katsorsartereernerup kingorna najugarisanni Allorfeqanngippat ikorfartorneqarnissat pillugu kommunimi sullissisunut imaluunniit suliffeqarfippit Allorfik isumaqatigiissuteqarfigippagu, sulisitsisunnut saaffiginnissinnaavutit.