Innuttaasut Allorfiup katsorsaaviini katsorsarneqartut amerlanersaat katsorsarneqarnertik naammagisimaarluinnarlugu imaluunniit naammagisimaarlugu misissuinermi akissuteqarsimapput.
- Iluarpoq. Qaqutigoorami taamaattumik oqaloqateqarluni. Allanik oqaloqateqartarnikuungaluarpunga. Iluarersuaarpara.
Allorfik Qeqertalimmi katsorsarneqartut ilaat, Allorfiup atuisut naammagisimaarinninnerat pillugu misissuinerani ilaatigut taama akissuteqarpoq.
Katsorsartinniarluni aallartinnermi naapinneq siulleq, katsorsarneqarnerup maannamut ingerlanera, katsorsaasup innuttaasullu akunnerminni suleqatigiinnerat kiisalu katsorsaasup katsorsarneqartumut soqutiginninnera katsorsartittut misissuinermi peqataasut pitsaasumik misigisaqarfigisimallugit nalilerpaat. Katsorsartittummi misissuinermi peqataasut 90 procentii sinnerlugit nammagisimaarinnipput imaluunniit naammagisimaarinnilluinnarput.
- Maanngaqqaarninniit massakkumut inissisimaninnut sanilliukkaangakku imminut naammangisimaarneroqaanga oqaloqateqartarnikka ulluinnannut oqilisaataalluaqimmata, innuttaasoq Allorfik Sermersuumi katsorsarneqartoq taama allappoq.
Innuttaasoq alla Allorfik Qeqqatami katsorsarneqartoq misissuinermi peqataanermini naggasiilluni ima ilanngussaqarpoq:
- Ullunik ataasiakkaarineq ilikkarpara, killiliisinnaaneq ilinniarpara.
Innuttaasut Allorfimmi katsorsartittut misissuinermi naammagisimaannginnerpaasaat tassaavoq Allorfiup oqartussaqarfinnik pisortaqarfinnillu allanik suleqateqarneranut tunngasoq. Apeqqummut tassunga akissuteqartut 39 procentii naammagisimaarinnillutik imaluunniit naammagisimaarinnilluinnarlutik akissuteqarsimapput, 14 procentii ’naluara’ akissutigalugu toqqarsimavaat, kiisalu akissuteqartut 2 procentii naammagisimaarinninnatik imaluunniit naammagisimaanngilluinnarlugu akissuteqarsimallutik. Allorfik tamatumunnga isumaqataavoq, taamaattumik oqartussaqarfinnik allanik suleqateqarnerup pitsanngorsarnissaa Allorfiup katsorsaaviini 2024-mi ukkatarineqaqqissaaq.
Innuttaasut Allorfiup katsorsaaviini tallimani katsorsarneqartut atuisut naammagisimaarinninnerannik misissuinermut peqataapput. Allorfiup katsorsaavii tassaapput Allorfik Kujalleq, Allorfik Sermersooq, Allorfik Qeqqata, Allorfik Qeqertalik aamma Allorfik Avanna.
Nalunaarusiaq ugguuna aaneqarsinnaavoq.